«كەرۋەن ساراي» راسىندا پەنوپلاستان سالىنعان با: شوكەيەۆ سىنعا جاۋاپ بەردى

نۇر- سۇلتان. قازاقپارات - بۇگىن ورتالىق كوممۋنيكاتسيالار قىزمەتىنىڭ كوشپەلى بريفينگىندە تۇركىستان وبلىسىنىڭ اكىمى ءومىرزاق شوكەيەۆ «كەرۋەن ساراي» نىسانىن سالۋدا قانداي قۇرىلىس ماتەريالدارى قولدانىلعانىن ايتتى، دەپ حابارلايدى قازاقپارات ءتىلشىسى.

«ول جەردە كۇن سايىن ءجۇردىم. ول تەمىر- بەتوننان، ارماتۋرادان سالىنعان. بۇل جەردە بارلىعى دا وڭىردە سەيسميكالىق قاۋىپ تومەن بولعاندىعىنا قاراماستان ۇلكەن ساقتىقپەن جوسپارلانعان. ارينە، ءارتۇرلى ىشكى ماتەريالدار، قابىرعا ماتەريالدارى قولدانىلعان. كەلۋشىلەردىڭ ءبىرى سول ماتەريالدى بايقاپ قالىپ، بۇكىل كەرۋەن ساراي سونىمەن سالىنعان دەپ ويلاپتى. بۇل قاراپايىم ماتەريال. ەگەر ول قۇرىلىستان حابارى بولسا مۇنداي جازبايتىن ەدى. جالپى، Sembol الەمدىك كومپانيا سانالادى. ول ءوزىنىڭ ابىرويىن قاتتى باعالايدى. ولار مۇنداي جايت ءۇشىن ابىرويلارىنا كەلگەن نۇقسانعا بايلانىستى جاۋاپقا دا تارتۋى مۇمكىن»، - دەدى ءومىرزاق شوكەيەۆ.

ءوڭىر باسشىسى پەنوپلاست ارزان قۇرىلىس ماتەريالى بولعاندىقتان بارلىق جەردە قولدانىلاتىندىعىن باسا ايتتى.

«ول وتە ارزان ءارى ءتيىمدى. جالپى، قازىرگى الەمدە بارلىعى پلاتماسسادان جاسالادى. مىنا ۇستەل، قالامساپ، ميكروفون پلاستماسسادان جاسالعان. سوندىقتان مەنىڭشە، جوق جەردەن تۇسىنىكسىز حايپ جاساپ وتىر. مۇنداي جايتتى ايتقان كەزدە جاۋاپكەرشىلىكتىڭ دە بولعانى دۇرىس- اۋ. ويتكەنى، ءبىز تۋريستەردى تارتقىمىز كەلەدى. شەتەلدىك ينۆەستورلاردىڭ قاراجاتىن تارتۋعا ۇمتىلامىز»، - دەدى وبلىس باسشىسى.