+7 (701) 759 90 19
31 °С : نۇر-سۇلتان
31 °С : الماتى
USD 424.99 EUR 504.21
RUB 5.81 CNY 65.66
جاڭالىقتار

ۋىز ەمبەي، ۇنتاق جەگەن ۇرپاق ۇساقتالىپ كەتپەي مە؟

18 ماۋسىم 10:05
:ءبولىسۋ
ۋىز ەمبەي، ۇنتاق جەگەن ۇرپاق ۇساقتالىپ كەتپەي مە؟

نۇر-سۇلتان.قازاقپارات - ەلىمىزدە سوڭعى ۋاقىتتا جاڭا تۋعان بالانى جاساندى قوسپامەن تاماقتاندىراتىندار كوبەيىپ بارادى. نارىق زامانى ما الدە، ادامنىڭ تاپقان امالى ما، ايتەۋىر بالاسىن ەكى- ءۇش جىل ەمىزەتىندەر نەكەن ساياق.

ءبىرى ءمۇسىنىم مۇلتىكسىز بولسىن دەپ ەمىزۋدى ەرتە توقتاتسا، ەندى ءبىرى ەڭبەك ەتەمىن دەپ اسىعادى. ەسەسىنە ءالجۋاز بالا كوپ. بوسانعان جاس انالاردىڭ 62 پروتسەنتى ۇرپاعىن جاساندى ۇنتاقپەن تويدىرادى ەكەن. مۇنداي دەرەكتى يۋنيسەف بالالار قورى بەردى جانە ونى ازايتۋ جولدارىن ۇسىندى.

ارداق شىرىنبەكوۆا، «انا سۇتىمەن ەمىزۋ» باعدارلاماسى بويىنشا ساراپشى، مەديتسينا عىلىمدارىنىڭ كانديداتى:

- انا ءسۇتى دەگەن تەڭدەسسىز، قۇدايدىڭ بەرگەن سىيى بولىپ ەسەپتەلەدى. سوندىقتان «انا ءسۇتىن الماستىرۋشىلار» دەگەن تەرميننىڭ ءوزى دە مۇلدە وعان سايكەس كەلمەيدى. ءار مينۋتتىڭ وزىندە انانىڭ ءسۇتى وزگەرىپ وتىرادى. ونى كادىمگىدەي عىلىمي تۇردە ۇستاپ الىپ، قۇرامىن تولىعىمەنەن 100 پايىز كۇيىندە انانىڭ سۇتىنە تەڭەستىرۋ مۇمكىن ەمەس. ءار انانىڭ ءسۇتىنىڭ قۇرامى ءارتۇرلى. ول اعزادا نارەستەنىڭ قاجەتىنە قاراي تۇزىلەدى. ال جاساندى ۇنتاق دايىندالعان ءبىر قۇراممەن شىعارىلادى. ول بىرەۋگە جاقسا، وزگەسىنە كەرى اسەر ەتەدى.

انار قىستاۋبايەۆا، پەدياتر:

- اناسىن ۇزاق ۋاقىت ەمگەن بالانىڭ يممۋنيتەتى مىقتى بولادى. ويتكەنى وندا بالاعا قاجەتتى بارلىق دارۋمەن بار جانە ارتىق نە كەم مولشەردە ەمەس. ال ءسۇتتىڭ ورنىنا جۇرەتىن قوسپادا كەيبىر دارۋمەندەر كوپ، كەيبىرى از بولۋى مۇمكىن. سونداي- اق نەدەن، قالاي جاسالعانىن جەتە بىلە بەرمەيمىز. ۇنتاق جەپ وسكەن بالالاردا اللەگريا، سەمىزدىك جانە ىشەك اۋرۋلارى ءجيى كەزدەسەدى.

بالاعا ۇنتاق بەرۋدەگى باستى سەبەپتەردىڭ ءبىرى - اناسىنان ءسۇت شىقپاۋ. الايدا دارىگەرلەر ءسابيىن سۇتكە جارىتا الماۋ مىڭ ادامدا ءبىر كەزدەسەتىن سيرەك جاعداي ەكەنىنە سەنىمدى.

حالىقارالىق يۋنيسەف قورى دا وسى پىكىردى ۇستانعان. ولاردىڭ ايتۋىنشا جاس انالار دۇرىس ءارى ۇزاق ەمىزۋدىڭ تيىمدىلىگىن ەسكەرە بەرمەيدى. سوسىن جارناماعا سەنىپ، جاساندى ءسۇتتىڭ كومەگىنە جۇگىنەدى.

ارتۋر ۆان ديزەن، UNICEF قازاقستانداعى وكىلى:

- قازىر قازاقستاندا نارەستەلەردىڭ تەك 38 پروتسەنتى 6 اي عانا انا سۇتىمەن قورەكتەنەدى. قالعانى ەمىزۋمەن قاتار قوسپالاردى قولدانادى. بۇل وتە از. جاس انالاردى دۇرىس ەمىزۋدىڭ تيىمدىلىگى تۋرالى اقپاراتتاندىرۋ كەرەك. ونىڭ ۇستىنە ماركەتينگ سالاسىن جۇيەلەۋ ماڭىزدى.

د د س ۇ ۇيىمى 40 جىل بۇرىن وسىنى رەتتەيتىن ەرەجە قابىلداعان. وندا مەديتسينا مەكەمەلەرىندە قانداي دا ءبىر ۇنتاقتى جارنامالاۋعا جانە دارىگەرلەردىڭ كەڭەس بەرۋىنە تىيىم سالىنعان. قازاقستان بۇل قۇجاتتى راتيفيكاتسيالاعان جوق.

زاۋرە قۇلاحمەتوۆا، «بالاجان» قوعامدىق قورىنىڭ ءبىلىم باعدارلامالارى بويىنشا ديرەكتورى:

- انا ءسۇتىن الماستىراتىن قوسپالاردىڭ جارناماسىن تەلەديداردان دا، كوشە بويىنداعى جارناما تاقتايلارىنان دا ءجيى كورەمىز. ولاردا تومپيعان بالانىڭ سۋرەتى، جاعىمدى اقپاراتتار جازىلادى. بۇل جاس انالاردا قوسپاعا قىزعۋشىلىعىن ارتتىرادى جانە ءسال ءسۇت شىقپاسا سوعان جۇگىنەدى. نەگىزى جاراتىلىستا ءار انا ءوز بالاسىنا قاجەتتى ءسۇتتى بەرە الادى. تەك دۇرىس تاماقتانىپ، قاجەتتى ەرەجەنى ساقتاۋى كەرەك.

قازىر ەمحانالاردا ءسابيىن سۇتكە جارىتا المايتىن انالارعا قوسپا تەگىن بەرىلەدى. ول ءۇشىن جەرگىلىكتى بيۋدجەتتەن قارجى ءبولىنىپ تاۋاردى جەتكىزۋشى تەندرمەن تاڭدالادى. بۇعان قوسا قوسپا شىعاراتىن كاسىپورىن مەديتسينا قىزمەتكەرلەرى اراسىندا تاۋارىن جارنامالاپ، سىيلىقتار ۇسىنادى. ءونىمىن كەڭەس بەرۋگە ۇگىتتەيدى. ويتكەنى تىيىم سالاتىن زاڭ جوق.

«قوسپانى شىعاراتىندارعا تالاپ قويىلۋ كەرەك. ياعني قوسپانىڭ قورابىندا ەمىزۋدىڭ پايداسى تۋرالى كەڭەستەر جازىلۋى ءتيىس» ، - دەيدى يۋنيسەف مامانى.

سونداي- اق ۇنتاقتى جارنامالاۋ ماسەلەسى تەز ارادا جۇيەلەنۋى قاجەت. بۇل جاس انانى جانساق ويدان قورعاپ، دەنى ساۋ ۇرپاقتىڭ وسۋىنە ءوز سەپتىگىن تيگىزەدى.

www.24.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049

مۇراعات