فۋتبولدان ەۋروپا چەمپيوناتى: نيدەرلاندى اۆستريانى ءسۇرىندىردى

نۇر- سۇلتان. قازاقپارات - فۋتبولدان ەۋروپا چەمپيوناتىنىڭ فينالدىق ساتىسىنىڭ توپتىق كەزەڭى ەكىنشى تۋرىندا نيدەرلاندى مەن اۆستريا قۇرامالارى كەزدەستى، دەپ حابارلايدى قازاقپارات ءتىلشىسى.

ەسكە سالساق، اتالعان ەكى قۇراما س توبىندا سىنعا تۇسەدى. قارسىلاستارى - ۋكراينا جانە سولتۇستىك ماكەدونيا. العاشقى تۋردا نيدەرلاندى ۋكراينادان 3:2 ەسەبىمەن باسىم تۇسسە، اۆستريا سولتۇستىك ماكەدونيانى 3:1 ەسەبىمەن جەڭدى.

بۇل توپتا كەشە، 17 ماۋسىمدا ەكىنشى تۋردا ۋكراينا سولتۇستىك ماكەدونيانى 2:1 ەسەبىمەن تىزە بۇكتىردى. ەكى قۇراما بۇعان دەيىن 19 مارتە كەزدەستى. ونىڭ توعىزىندا نيدەرلاندى جەڭىپ، التاۋىندا اۆستريا باسىم تۇسسە، قالعانىندا تەڭ ناتيجە تىركەلدى.

ايتا كەتەرلىگى، اۆستريا اتالعان قارسىلاسىن 1990 -جىلدان بەرى جەڭە الماي كەلەدى. سودان بەرى التى ويىندا دا نيدەرلاندىلىق فۋتبولشىلار اۆستريالىقتاردى قاپى قالدىرىپ ءجۇر. بۇگىنگى كەزدەسۋدە قوس قۇرامانىڭ دا ويىنى قارقىندى بولدى. جەڭىسكە جەتكەنى جارىستىڭ كەلەسى ساتىسىنا بەرىلەتىن جولدامانى ءبىر تۋر بۇرىن قالتاعا باسۋى ءتيىس.

ويىننىڭ 11-مينۋتىندا اۆسترياعا قاقپاسىنا بەلگىلەنگەن پەنالتيدى مەمفس دەپاي ءمۇلت جىبەرگەن جوق. ال دەنزەل ديۋمفريس 67-مينۋتتا قورىتىندى ەسەپتى بەلگىلەدى. وسىلايشا نيدەرلاندى قارسىلاسىنان 2:0 ەسەبىمەن باسىم ءتۇستى.