فۋتبولدان ەۋروپا چەمپيوناتى: ۋكراينا العاشقى جەڭىسىنە قول جەتكىزدى

نۇر-سۇلتان. قازاقپارات - فۋتبولدان ەۋروپا چەمپيوناتىنىڭ فينال ساتىسىنداعى توپتىق كەزەڭى ەكىنشى تۋرىندا ۋكراينا مەن سولتۇستىك ماكەدونيا قۇرامالارى كەزدەستى، دەپ حابارلايدى قازاقپارات ءتىلشىسى.

ەسكە سالساق، اتالعان ەكى قۇراما س توبىندا سىنعا تۇسەدى. قارسىلاستارى - نيدەرلاندى جانە اۆستريا.

العاشقى تۋردا ۋكراينا نيدەرلاندىدان 2:3 ەسەبىمەن جەڭىلسە، سولتۇستىك ماكەدونيا اۆسترياعا 1:3 ەسەبىمەن ەسە جىبەردى. ەكى قۇراما بۇعان دەيىن ءتورت مارتە كەزدەسكەن. ونىڭ ۇشەۋىندە ۋكرايندار جەڭىسكە جەتىپ، بىرەۋىندە ماكەدوندار باسىم تۇسسە، بىرەۋىندە تەڭ ناتيجە تىركەلدى.

بۇگىنگى كەزدەسۋدە ەكەۋىنىڭ ءۇش ۇپايدى ولجالاۋعا مۇمكىندىگى زور بولدى. دەسە دە، ۋكرايندار جەڭىسكە جەتۋگە جاقىن تۇردى. ولاردىڭ قاتارىنان اندرەي يارمولەنكو 29، رومان يارەمچۋك 34-مينۋتتاردا مەرگەندىك تانىتسا، قارسىلاستارىنان ەزگان اليوسكي 57-مينۋتتا ەسەپ ايىرماسىن قىسقارتتى.

بۇدان كەيىن تابلوداعى ەسەپكە وزگەرىس ەنگەن جوق. ەندى س توبىندا بۇگىن تاعى ءبىر ويىندا نيدەرلاندى مەن اۆستريا كەزدەسەدى. ول ەلوردا ۋاقىتىمەن 00.45-تە «Qazsport» تەلەارناسىنان تىكەلەي ەفيردە كورسەتىلەدى.