بولاشاق جارىڭىزدان مىندەتتى تۇردە سۇراڭىز
سودان كەيىن ىدىس-اياقتىڭ سىلدىرى ەكى جاستى ەكى جاققا اجىراتىپ تىنادى.
«ۇيلەنۋ وڭاي، ءۇي بولۋ قيىن» ەكەنىن ەسكەرىپ، قيىندىقتى بىرگە جەڭە الاتىن-جەڭە المايتىنىن انىقتاۋ ءۇشىن، كەلەشەك تۋرالى كوبىرەك سويلەسۋى كەرەك.
بولاشاق جارىڭىزعا مىندەتتى تۇردە مىنا سۇراقتى قويىپ، پىكىرىڭىز، كوزقاراسىڭىز سايكەس كەلە مە، كوز جەتكىزىپ الىڭىز.
► قانداي سىردى مەنەن جاسىرۋىڭ مۇمكىن؟ قانداي تاقىرىپتا مەنىمەن سويلەسكىڭ كەلمەس ەدى؟
► مەن تۋرالى قاۋەسەت ەستىگەندە ەڭ ءبىرىنشى ارەكەتىڭ قانداي بولار ەدى؟
► ءومىردىڭ بار ءمانى تەك بالا ما؟ ارادا بالا بولماسا قايتەر ەدىڭ؟ اجىراسىپ كەتەسىڭ بە الدە باسقا شەشىم قابىلدايسىڭ با؟
► نەشە بالاڭ بولعانىن قالايسىڭ؟ (ءبىرى از، ءبىرى كوپ بولسىن دەۋى دە مۇمكىن)
► ءوز ءۇيىمىز بولۋى مىندەتتى مە؟ ءبىراز ۋاقىت پاتەردە تۇرۋعا كوزقاراسىڭ قانداي؟
► جاقىندارىڭ مەنى جاقتىرماسا، ۇرىسسا، كۇندەسە، كىمنىڭ جاعىندا بولاسىڭ؟ مۇنداي ماسەلەنى قالاي شەشەمىز؟
► ىشەرگە اس، كيەرگە كيىم تابىلماي قالسا، جۇمىسسىز قالساق نە ىستەيمىز؟ بىرگە تۇرا بەرۋگە كونەر مە ەدىڭ؟
► وتباسى بيۋجەتىن كىم باسقارادى؟ كىمنىڭ كوپ اقشا تاپقانى ماڭىزدى ما؟
► ءۇي شارۋاسى مەن بالا تاربيەسىنە كىم جاۋاپتى؟ ەكەۋمىزگە دە ورتاق پا؟
► بولاشاقتا ءمۇسىنىم وزگەرىپ كەتسە، كوپ سالماق قوسسام نە تىم ارىق بولسام، قالاي قابىلدايسىڭ؟ ايىقپاس دەرتكە شالدىقسام شە؟
► دەمالىستى قالاي وتكىزگىڭ كەلەدى؟ سەن ءۇشىن دەمالىس دەگەن نە؟
► ۋاقىتىمنىڭ كوپ بولىگىن جۇمىستا وتكىزەتىن بولسام نەمەسە مۇلدەم جۇمىس ىستەمەيتىن بولسام نە دەر ەدىڭ؟
► قىزعانىشتى قالاي جەڭەسىڭ؟ مۇلدەم تانىمايتىن ادام ماعان كوز قىرىن سالسا، نە ىستەيسىڭ؟
ادامدى ءبىر جىل، بەس جىل، ون جىل وتسە دە، تولىق تاني المايسىڭ. ول ءبارىبىر ۇيىندە باسقا، ارىپتەستەر ورتاسىندا باسقا، دوستار اراسىندا ءوزىن مۇلدەم باسقاشا ۇستاۋى مۇمكىن. بۇل قالىپتى جاعداي. الايدا ومىرلىك كوزقاراسىڭ ۇقساس بولسا، پىكىرىڭ ءبىر-بىرىمەن ۇيلەسەتىن بولسا، ءبىراز ماسەلەنى وڭاي شەشۋگە بولادى. وي دا ۇنەمى وزگەرىپ وتىرادى.
ال بىرگە دامىپ، بىرگە ءوسۋ ءۇشىن دە قازىرگى دەڭگەيىڭ ءبىر بولعانى ماڭىزدى. ەڭ باستىسى ءبىر-بىرىمەن كەز كەلگەن ماسەلەنى تالقىلاپ، ءبىر شەشىمگە كەلۋ ءۇشىن، ەڭ الدىمەن، داۋىس كوتەرمەي، ارتىن ۇرىسقا ۇلاستىرماي، ءتىل تابىسا الۋ، پىكىرىڭدى اشىق جەتكىزە الۋ، لەبىزدەسە، سىرلاسا الۋ ەكى جاسقا اۋاداي قاجەت.
massaget.kz