قازاقستاندا مەملەكەتتىك قىزمەتشىلەردى زەينەتاقىمەن قامتۋ پرينتسيپى وزگەرەدى

نۇر-سۇلتان. قازاقپارات - ق ر مەملەكەتتىك قىزمەت ىستەرى اگەنتتىگى مەملەكەتتىك قىزمەتشىلەردى زەينەتاقىمەن قامتۋ ماسەلەسىندەگى ادىستەردى قايتا قاراۋدى ۇسىنىپ وتىر.

بۇل جايىندا بۇگىن ق ر پرەزيدەنتى جانىنداعى ادام قۇقىقتارى جونىندەگى كوميسسيا وتىرىسىندا بەلگىلى بولدى، دەپ حابارلايدى قازاقپارات ءتىلشىسى.

«دەڭگەيى جوعارى كاسىبي مامانداردى مەملەكەتتىك قىزمەتكە تارتۋ جانە ۇستاپ قالۋ ءۇشىن ونىڭ تارتىمدىلىعىن ارتتىرۋ تالاپ ەتىلەدى. قوعامنىڭ يگىلىگىنە جۇمىس ىستەۋدى قالايتىن جانە ول قولىنان كەلەتىن مامانداردىڭ بارلىعى وزدەرى ءۇشىن بارلىق جاعدايدىڭ جاسالاتىندىعىنا سەنىمدى بولۋى ءتيىس. الدىڭعى قاتارلى شەت ەلدەردىڭ تاجىريبەسىندە باسەكەگە قابىلەتتى ءارى تۇراقتىلىعىنا كەپىلدىك بار جالاقىدان بولەك مەملەكەتتىك قىزمەتشىگە جەكەلەگەن الەۋمەتتىك كەپىلدىك تە ۇسىنىلادى»، - دەدى كوميسسيا وتىرىسىندا ق ر مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى مارات داۋەشوۆ.

ونىڭ العا تارتقان دەرەگىنە سايكەس، فرانسيادا مەملەكەتتىك قىزمەتشىلەرگە ايتارلىقتاي الەۋمەتتىك توپتاما بەرىلەدى. وعان بالاعا ارنالعان جوعارى جاردەماقى، قوعامدىق كولىكتەگى جەڭىلدىك، بانكتەردەن ارزان زايم كىرەدى.

بۇعان قوسا، زەينەتاقى مولشەرى سوڭعى جالاقىسى مەن جىل سايىنعى تولەمگە بايلانىستى بولادى. جانە دە زەينەتاقى سوڭعى جۇمىس ورنىنداعى جالاقىنىڭ 75-85 پايىزىن قۇرايدى.

ال ۇلى بريتانيادا مەملەكەتتىك قىزمەتشىلەردىڭ زەينەتاقىسى جوعارى زەينەتاقى اۋدارىمدارىنىڭ ەسەبىنەن قوماقتى بولىپ كەلەدى.

جاپونيادا مەملەكەتتىك قىزمەتشىگە بەرىلەتىن الەۋمەتتىك توپتاماعا تۇرعىن ءۇي جانە قوعامدىق كولىك وتەماقىسى كىرەدى.

گەرمانيا، اۆستراليا، ۇلى بريتانيادا مەملەكەتتىك قىزمەتشىلەر ءۇشىن مەديتسينالىق ساقتاندىرۋ مىندەتتى سانالادى. مىنە وسى تاجىريبەلەردى ەسكەرە وتىرىپ ەلىمىزدىڭ مەملەكەتتىك قىزمەت ىستەرى اگەنتتىگى مەملەكەتتىك قىزمەتشىلەردى زەينەتاقىمەن قامسىزداندىرۋ ماسەلەسى تاسىلدەرىن قايتا قاراۋدى ۇسىنىپ وتىر.

«بۇگىندە اكىمشىلىك مەملەكەتتىك قىزمەتشىلەردە زەينەتاقى اۋدارىمى بولىگىندە قانداي دا ءبىر باسىمدىق جوق. بۇعان قوسا، مەملەكەتتىك قىزمەتشى زەينەتكەرلىككە شىعاتىن ساتتە زەينەتاقى قورىندا جيناقتالعان اتالعان قاراجات ينفلياتسيا مەن ءومىر ءسۇرۋ دەڭگەيىنىڭ ارتۋىن ەسكەرگەندە ارى قاراي تىرشىلىك ەتۋىن قامتاماسىز ەتە المايدى. وسىعان وراي، مەملەكەتتىك ورگاننىڭ ەسەبىنەن الەۋمەتتىك اۋدارىمنىڭ جوعارى پايىزىن بەلگىلەۋ ۇسىنىلادى. سونىمەن قاتار مەملەكەتتىك قىزمەتشىگە مەملەكەتتىك قىزمەتتە بولعان ءار جىلى ءۇشىن جيناقتالعان زەينەتاقى جيناعىنا قوسىمشا اۋدارىم جاساۋ دا ۇسىنىپ وتىر. ايتا كەتەرلىگى، مۇنداي نورما قازاقستاندا اسكەري قىزمەتشىلەر ءۇشىن قولدانلادى»، - دەدى مارات داۋەشوۆ.