گاز باعاسىن بەلگىلەۋدىڭ تۇسىنىكتى ءارى اشىق مودەلى قاجەت: پرەزيدەنت ۇكىمەتكە ەكى اي ۋاقىت بەردى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ گاز سالاسىن دامىتۋ جونىندەگى كەڭەستە ىشكى گاز نارىعىنداعى باعا بەلگىلەۋ ءىسىن جەتىلدىرۋدى تاپسىردى، دەپ حابارلايدى قازاقپارات.

ونىڭ ايتۋىنشا، وڭىرلەردى جاپپاي گازبەن قامتاماسىز ەتۋ - گاز تۇتىنۋ كولەمىنىڭ ارتۋىنا اكەپ سوعادى.

سوڭعى بەس جىلدا ىشكى نارىقتاعى گاز 40 پايىزعا، ياعني 12 دەن 17 ميلليارد تەكشە مەترگە دەيىن ارتتى. وسى رەتتە قازاقستانداعى گازدىڭ باعاسى ت م د ەلدەرىنىڭ ىشىندە ەڭ تومەنگى دەڭگەيدە بولىپ وتىر.

- بۇعان دەيىن وڭىرلەر بويىنشا گاز تاريفىن رەتتەۋ جانە حالىقتى قولجەتىمدى گازبەن قامتاماسىز ەتۋ جونىندە تاپسىرما بەردىم. وسى باعىتتاعى جۇمىستاردى جانداندىرۋ كەرەك. ءبىر سوزبەن ايتقاندا، حالىقتىڭ الەۋمەتتىك جاعدايى تومەن توپتارىن، سونداي-اق، جۇمىسى گاز باعاسىنا تىكەلەي بايلانىستى ەكونوميكا سالالارىن جۇيەلى تۇردە قورعاۋ ماقساتىمەن باعا بەلگىلەۋدىڭ تۇسىنىكتى ءارى جاڭا اشىق مودەلى قاجەت.

ۇكىمەتكە 1- قىركۇيەككە دەيىن اتالعان ماسەلەنىڭ ءادىس- تاسىلدەرىن ازىرلەۋدى تاپسىرامىن، - دەدى قاسىم-جومارت توقايەۆ.

پرەزيدەنت گاز تاسىمالداۋ جۇيەسىن جاڭعىرتۋ ءۇشىن ۇكىمەت پەن «سامۇرىق-قازىنا» ءال اۋقات قورىنا ەكسپورتتان، ءتىپتى، جەكەشەلەندىرۋدەن تۇسەتىن تابىستى قوسا العاندا، قوسىمشا قارجىلاندىرۋ كوزدەرىن ىسكە قوسۋدى تاپسىردى.

ايتا كەتەيىك، بۇگىن قاسىم-جومارت توقايەۆ گاز سالاسىن دامىتۋ جونىندە كەڭەس وتكىزدى.