جوعارى وقۋ ورىندارىندا ارحيۆ ءىسى بويىنشا ماماندىقتار اشۋ كەرەك – رايىمقۇلوۆا

نۇر- سۇلتان. قازاقپارات - ەلىمىزدىڭ جوعارى وقۋ ورىندارىندا ارحيۆ ءىسى بويىنشا ماماندىقتار اشۋ كەرەك.

بۇل تۋرالى ق ر پرەزيدەنتى جانىنداعى ادام قۇقىقتارى جونىندەگى كوميسسيا وتىرىسىندا مادەنيەت جانە سپورت ءمينيسترى اقتوتى رايىمقۇلوۆا ايتتى، دەپ حابارلايدى قازاقپارات ءتىلشىسى.

«ارحيۆ مەكەمەلەرىن بىلىكتى كادرلارمەن قامتاماسىز ەتۋ پروبلەماسى وزەكتى بولىپ قالۋدا. رەسپۋبليكا ارحيۆتەرىندە بەيىنى بويىنشا ءبىلىمى بار مامانداردىڭ بار- جوعى 2,5 پايىزدى قۇرايدى. سونىمەن قاتار مينيسترلىككە ەلەكتروندىق قۇجات اينالىمى جانە ەلەكتروندىق ارحيۆ بولىگىندەگى قىزمەتتەردى بەرگەننەن كەيىن تەحنيكالىق ءبىلىمى بار ماماندار تاپشىلىعى پروبلەماسى وتكىر بولىپ تۇر»، - دەدى مينيستر.

ونىڭ ايتۋىنشا، كەيبىر ارحيۆتەردە جىل ىشىندە اۋىسىمدىلىق قۇرامنىڭ 50 پايىزدان استامىن قۇرايدى. بۇل رەتتە، مەملەكەتتىك ارحيۆ مەكەمەلەرىنىڭ شتات سانىنىڭ قىسقارۋىنا قاراماستان، ساقتالاتىن قۇجاتتار كولەمىنىڭ ۇلعايۋى بايقالادى.

«ارحيۆ سالاسىندا بىلىكتى كادرلاردىڭ جەتىسپەۋشىلىگىنىڭ باستى سەبەبى - ءارحيۆشى ماماندىقتارى مارتەبەسىنىڭ تومەندىگى. سوندىقتان رەسپۋبليكانىڭ جوعارى وقۋ ورىندارى وسى باعىت بويىنشا ماماندار دايارلاۋعا مۇددەلى ەمەس. مىسالى، ءال- فارابي اتىنداعى قازاق ۇلتتىق ۋنيۆەرسيتەتى - «ارحيۆ- جۇرگىزۋ»، «قۇجات- جۇرگىزۋ» جانە «قۇجاتتامالىق قامتاماسىز ەتۋ» ماماندىقتارى بويىنشا ماماندار دايارلاۋدى جۇزەگە اسىراتىن جالعىز جوعارى وقۋ ورنى. سوندىقتان وڭىرلەردىڭ جوعارى وقۋ ورىندارىندا ارحيۆ ءىسى جانە قۇجاتتاما سالاسى بويىنشا ماماندىقتار اشۋ، سونداي- اق ق ر ءبىلىم مينيسترلىگى «ارحيۆ تانۋ»، «قۇجات تانۋ» جانە «قۇجاتتامالىق قامتاماسىز ەتۋ» ماماندىقتارى بويىنشا مەملەكەتتىك گرانتتاردى ۇلعايتۋ قاجەت»، - دەدى اقتوتى رايمقۇلوۆا.