قىرعىزستاندا پاندەميانىڭ ءۇشىنشى تولقىنى باستالىپ، بيلىك قاۋىپسىزدىك شارالارىن كۇشەيتتى

بىشكەك. كابار- قازاقپارات - سوڭعى كۇندەرى قىرعىزستان ەلىندە كوروناۆيرۋس ينفەكتسياسىنا قاتىستى جاعداي كۇرت ناشارلادى.

بۇعان دەيىن بولجامدالعانداي، ماۋسىم بىلتىرعى جىلعىداي ەل ءۇشىن كۇردەلى سىناققا اينالۋى مۇمكىن. ستاتيستيكا بويىنشا، كۇن سايىن اۋرۋعا شالدىعۋدىڭ جاڭا وقيعالارىنىڭ سانى تەك ءوسىپ كەلەدى (كۇنىنە 1000 وقيعاعا جاقىنداپ كەلەدى). ۆاكسينالاۋ جۇرگىزىلگەنىمەن، پرەپاراتتار ازىرگە بارىنە بىردەي جەتىپ جاتقان جوق. بۇل تۋرالى قازاقپارات قىرعىزستاننىڭ كابار اقپارات اگەنتتىگىنە سىلتەمە جاساپ حابارلايدى.

وسىعان بايلانىستى، جاقىندا ەل بيلىگى قىرعىزستاندا كوروناۆيرۋستىڭ ۇشىنشگى تولقىنى باستالىپ كەتكەنىن مالىمدەدى. ءتۇرلى قاۋىپسىزدىك شارالارى كۇشەيتىلىپ، بيلىك حالىقتى دەنساۋلىعىنا مۇقيات قاراۋعا، قوعامدىق ورىنداردا ماسكا تاعۋعا، قولدى ءجيى جۋىپ تۇرۋعا ۇندەپ وتىر. بىشكەكتە بۇدان دا قاتاڭ شارالار ەنگىزۋ جوسپارلانۋدا. وسىلايشا، 17 -ماۋسىمنان باستاپ ەل استاناسىندا كوڭىل كوتەرۋ مەكەمەلەرىنىڭ جۇمىسىنا قاتىسى بار ءبىرقاتار شەكتەۋلەر ەنگىزىلەتىن بولادى.

«كوروناۆيرۋس ينفەكسياسىنا شالدىعۋ وقيعالارىنىڭ كۇن سايىن وسىمىنە بايلانىستى 2021 -جىلدىڭ 17-ماۋسىمىنان باستاپ ويىن- سايىق مەكەمەلەرى (تۇنگى كلۋبتار، مەيرامحانالار، قوعامدىق تاماقتانۋ ورىندارى، ءدامحانا، كاراوكە، بارلار)، سونىڭ ىشىندە ساۋدا، ويىن- ساۋىق ورتالىقتارىندا ورنالاسقان كوڭىل كوتەرۋ ورىندارىنىڭ جۇمىس كەستەسىنە شەكتەۋ ەنگىزۋ شەشىمى قابىلدانعان. ەندى اتالعان ورىندار تۇنگى ساعات 23:00 دەن باستاپ تاڭعى ساعات 7:00 گە دەيىن جۇمىس ىستەيتىن بولادى»، - دەلىنگەن بىشكەك مەرياسىنىڭ مالىمدەمەسىندە.

اكىمشىلىڭتەن اتاپ وتكەندەي، بۇل شەشىم الەۋمەتتىك بلوك جونىندەگى ۆيتسە- مەر ۆيكتوريا موزگاچيەۆانىڭ توراعالىعىمەن وتكەن قالالىق توتەنشە ەپيدەمياعا جانە ەپيزووتياعا قارسى كوميسسيانىڭ وتىرىسى بارىسىندا قابىلدانعان.

«كوميسسيا مۇشەلەرى بىشكەك قالاسىنداعى ەپيدەميولوگيالىق جاعداي مەن كوروناۆيرۋس ينفەكسياسىنىڭ ودان ارى تارالۋىن بولدىرماۋ بويىنشا قابىلدانىپ وتىرعان شارالاردى تالقىعا سالعان. ونىڭ قورىتىندىسى بويىشا شەكتەۋ ەنگىزۋ تۋرالى ءتيىستى شەشىم قابىلداندى»، - دەپ اتاپ ءوتتى قالالىق مەريادان.

بۇدان بولەك، قوعامدىق كولىك ىشىندە سانيتارلىق نورمالاردىڭ ساقتالۋىن قاداعالاۋ بويىنشا رەيدتەر جۇرگىزىلەدى. بىشكەك ۆيتسە- ءمەرى ەل استاناسىنداعى ايالدامالار مەن قوعامدىق كولىكتەردە ماسكالاردى تەگىن تاراتۋ ماسەلەسى قاراستىرىلىپ جاتقانىن اتاپ ءوتتى.