قازىرگى ۋاقىتتا الماتىنىڭ ەپيدەميولوگيالىق جاعدايى قانداي

الماتى. قازاقپارات - ماۋسىم ايىندا الماتىدا كوروناۆيرۋستىڭ تارالۋى ەكى ەسە ازايدى.

بۇل تۋرالى الماتى قالاسى سانيتارلىق- ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتارلىق دارىگەرى جانداربەك بەكشين مالىمدەدى، دەپ حابارلايدى قازاقپارات ءتىلشىسى.

وڭىرلىك كوممۋنيكاتسيالار قىزمەتى الاڭىندا سويلەگەن سوزىندە ول اۋرۋدىڭ جويىلماعانىن، وتكەن تاۋلىكتە مەگاپوليستە كوروناۆيرۋس ينفەكتسياسىنىڭ 112 جاڭا جاعدايى تىركەلگەنىن ايتتى.

جانداربەك بەكشين ەپيدەميولوگيالىق جاعدايدى تۇراقتاندىرۋ اياسىندا حالىققا ۆاكسيناتسيا ەڭ ماڭىزدى مىندەت بولىپ قالا بەرەتىندىگىن اتاپ ءوتتى. سونىمەن قاتار ول سانيتارلىق تالاپتاردى ساقتاۋ كەرەكتىگىن ەسكە سالدى.

«12-ماۋسىمنان باستاپ الماتى «جاسىل» ايماقتا. ايدىڭ باسىنان باستاپ كوروناۆيرۋستىق اۋرۋ 2 ەسە ازايدى. وتكەن تاۋلىكتە ك ۆ ي اۋرۋىنىڭ 112 جاعدايى تىركەلدى، كۇندەلىكتى ءوسىم %0,1 دەيىن تومەندەدى»، - دەدى جانداربەك بەكشين.

ول ەپيدەميا باستالعاننان بەرى الماتى قالاسىندا 71820 اۋرۋ تىركەلگەنىن، ال وسى جىلدىڭ باسىنان بەرى 53000-نان استام جاعدايدىڭ ورىن العانىن ەسكە سالدى.

«حالىقتىڭ 100 مىڭ تۇرعىنىنا شاققانداعى تارالۋ دەڭگەيى سوڭعى 7 كۇندە تومەندەۋدە - رەپرودۋكتيۆتى سانى 0,79 دا تۇراقتانعان جاعدايدا 64,7 دەن 39,8 گە دەيىن تومەندەدى، بۇل «جاسىل» ايماق پارامەترلەرىنە سايكەس كەلەدى» - دەپ ءتۇسىندىردى الماتى قالاسىنىڭ باس سانيتارلىق دارىگەرى.

جانداربەك بەكشين الماتى قالاسىنىڭ باس مەملەكەتتىك سانيتارلىق دارىگەرىنىڭ جاڭا جارلىعى دايىندالعانىن جانە 19 ماۋسىمنان باستاپ كۇشىنە ەنەتىنىن ايتىپ ءوتتى. جاڭا قۇجاتقا سايكەس، كاسىپكەرلەرگە ءبىرقاتار جەڭىلدىكتەر ايقىندالادى.

ەسكە سالا كەتەيىك، وتكەن تاۋلىكتە قازاقستاندا كوروناۆيرۋستىق ينفەكسيا بويىنشا وڭ پ ت ر- مەن 1145 جاعداي انىقتالدى.