قانداي ۇيىرمەلەر مەن سەكسيالار تەگىن بولادى؟

نۇر-سۇلتان. قازاقپارات - ق ر مادەنيەت جانە سپورت مينيسترلىگى مادەنيەت كوميتەتى ءتوراعاسىنىڭ ورىنباسارى كۇمىس سەيىتوۆا بالالارعا ارنالعان قانداي ۇيىرمەلەر مەن سەكسيالار مەملەكەتتىك تاپسىرىسپەن تولەنەتىنىن ايتىپ بەردى، دەپ حابارلايدى قازاقپارات ءتىلشىسى.

«شىعارماشىلىق ۇيىرمەلەردىڭ بەكىتىلگەن تىزىمىندە 9 باعىت بويىنشا 59 ۇيىرمە بار. ولار - ءبي، بەينەلەۋ ونەرى، ساندىك-قولدانبالى شىعارماشىلىق، تەاتر جانە كينو، زاماناۋي ارت-يندۋستريا، ۆوكال، اسپاپتىق ورىنداۋ، مۋزەي ءىسى جانە ادەبي ۇيىرمەلەر»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

كوميتەت وكىلى ءار وڭىردە شىعارماشىلىق ۇيىرمەلەر جىل سايىن بالالاردىڭ قاجەتتىلىگىنە جانە قىزمەت كورسەتۋشىلەر مۇمكىندىگىنە بايلانىستى، كوزدەلگەن نىسانالى قاراجات شەگىندە جۇمىس ىستەيتىنىن ايتتى.

«ءبىرىنشى كەزەكتە پلاتفورمادا شىعارماشىلىق ۇيىرمەلەردىڭ جۇمىسىن ۇيىمداستىرۋعا دايىن قىزمەت كورسەتۋشىلەر ءتىزىمى جاسالۋى ءتيىس»، - دەيدى كۇمىس سەيىتوۆا.

بۇعان دەيىن مادەنيەت جانە سپورت ۆيتسە-ءمينيسترى ە. قوجاعاپانوۆ قازاقستاندا 82 مىڭ بالا ۇيىرمە مەن سپورت سەكسياسىنا تەگىن قاتىسا الاتىنىن ايتقان ەدى.

بالالار ۇيىرمەلەرى مەن سپورت سەكسيالارىن جان باسىنا قارجىلاندىرۋ ءۇشىن Artsport.edu.kz اقپاراتتىق جۇيەسى ازىرلەندى.