توكيو وليمپياداسى: قازاقستان سپورتشىلارىنىڭ فورماسى قاشان دايىن بولادى؟

نۇر-سۇلتان. قازاقپارات - ق ر مادەنيەت جانە سپورت ۆيتسە-ءمينيسترى ەرلان قوجاعاپانوۆ قازاقستاندىق سپورتشىلار توكيو وليمپياداسىندا قانداي فورما كيەدى دەگەن سۇراققا جاۋاپ بەردى، دەپ حابارلايدى قازاقپارات ءتىلشىسى.

«بۇل ماسەلە ۇلتتىق وليمپيادا كوميتەتىنىڭ باقىلاۋىندا. مەنىڭ بىلۋىمشە، وسى ايدىڭ سوڭىنا دەيىن بۇل فورمانى كورە الامىز. كيىمدى ۇلتتىق كومپانيا تىگەدى، كەيبىر ەلەمەنتتەر جاڭا يننوۆاتسيالىق ادىستەرمەن شەشىلىپ جاتىر. ءبىز ءار وليمپيادادا فورمامىزعا وزگەرىستەر ەنگىزەمىز، توكيو وليمپياداسىنداعى ۇلتتىق قۇرامامىزدىڭ فورماسى ريوعا قاراعاندا ادەمىرەك بولاتىنىنا سەنەمىن»، - دەدى ەرلان قوجاعاپانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءتىلشى سۇراعىنا.

بۇعان دەيىن مادەنيەت جانە سپورت ۆيتسە-ءمينيسترى توكيوداعى وليمپياداعا باراتىن سپورتشىلاردىڭ قانداي ۆاكسينا سالدىرعانىن ايتىپ بەرگەن ەدى.