ەرالى توعجانوۆ كوروناۆيرۋستى ەمدەۋ حاتتاماسى نەگە بىرنەشە مارتە وزگەرگەنىن ءتۇسىندىردى
«وسى ءساتتى پايدالانىپ، پاندەميامەن كۇرەسۋ ارقىلى قازاقستاننىڭ بولاشاعىنا ولشەۋسىز ۇلەس قوسقان ءبىرقاتار ازاماتقا العىس ايتقىم كەلەدى. ونىڭ ىشىندە نۇر-سۇلتان قالاسىنىڭ باس ينفەكتسيونيست دارىگەرى اتىعايەۆا ساۋلە قابي قىزى پاندەمينىڭ ءبىرىنشى كۇنىنە باستاپ ينفەكتسيالىق گوسپيتالگە باسشىلىق جاساپ، 2000 نان استام اۋىر جاعدايداعى ناۋقاستى ەمدەۋگە اتسالىستى. الماتى قالاسىنداعى جەكەنوۆ اتىنداعى ينفەكتسيالىق اۋرۋحانانىڭ دارىگەرى وتاعانوۆا تامارا قۇستاي قىزى 1000 نان استام اۋىر دارەجەلى ناۋقاستى ەمدەپ شىقتى. قاراعاندى مەديتسينا ۋنيۆەرسيتەتىنىڭ پروفەسسورى كۋچەروۆا باقىت نۇرالى قىزى كوروناۆيرۋس ۆيرۋسىن ەمدەۋدىڭ كلينيكالىق حاتتاماسىن ازىرلەۋ توبىنا جەتەكشىلىك ەتىپ، 100 دەن اسا ۆەبينار وتكىزدى»، - دەدى ۆيتسە-پرەمەر.
ەرالى توعجانوۆ بىلتىرعى ناۋرىز ايىنان بەرى كوروناۆيرۋسپەن كۇرەسكە تارتىلعان مەديتسينا قىزمەتكەرلەرىنە 180 ميلليارد تەڭگە ۇستەمەاقى تولەنگەنىن ەسكە سالدى.
«اشىعىن ايتقاندا، وڭاي بولعان جوق ەدى. حاتتامانى بىرنەشە رەت وزگەرتۋگە تۋرا كەلدى. قىسقا ۋاقىتتىڭ ىشىندە حاتتاما 11 رەت اۋىستىرىلدى. بۇل ءبىز عانا قابىلداعان شەشىم ەمەس. بۇكىل الەم دارىگەرلەرىنىڭ، دۇنيەجۇزىلىك دەنساۋلىق ساقتاۋ ۇيىمىنىڭ تىكەلەي شەشىمدەرىنە بايلانىستى وسىلاي بولدى. 840 مەديتسينا قىزمەتكەرى مەملەكەت باسشىسىنىڭ شەشىمىمەن «حالىق العىسى» مەدالىمەن ماراپاتتالدى. كوروناۆيرۋس ينفەكتسياسىمەن كۇرەسكە تىكەلەي قاتىسقان مەديتسينا قىزمەتكەرلەرىنە وتكەن جىلدىڭ ناۋرىز ايىنان باستاپ جالپى سوماسى 180 ميلليارد تەڭگە ۇستەمەاقى تولەندى»، - دەدى پرەمەر-ءمينيستردىڭ ورىنباسارى.