قازاقستاندا كۇنىنە قانشا ادام ۆاكسينا الىپ جاتىر

None
None
نۇر-سۇلتان. قازاقپارات - قازاقستاندا كۇنىنە 90-100 مىڭ ادام ۆاكسينا الىپ جاتىر.

بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«ارينە، ءبىز ۆاكسيناتسيا بارىنشا تەزىرەك بىتكەنىن قالايمىز. بۇل رەتتە جۇرگىزىپ جاتقان جۇمىستارىمىزدى كۇشەيتە ءتۇسۋ قاجەت دەپ ەسەپتەيمىن. وڭىرلەرمەن نە ىستەپ جاتىرمىز؟ اپتا سايىن كوروناۆيرۋسپەن كۇرەس جونىندەگى ۆەدومستۆوارالىق كوميسسيا وتەدى. وندا ءبىز وڭىرلەرگە اقپاراتتىق- ءتۇسىندىرۋ جۇمىسىن كۇشەيتۋ قاجەتتىگىن ايتامىز. ويتكەنى، ۆاكسينا ەرىكتى تۇردە سالىنادى»، - دەدى مينيستر ورتالىق كوممۋنيكاتسيالار قىزمەتىندەگى بريفينگ بارىسىندا.

سونىمەن قاتار ول سوڭعى كۇندەرى ەلىمىزدە ۆاكسينالاۋ قارقىنى ارتا تۇسكەندىگىن باسا ايتتى. «ايتالىق، كەشە شامامەن 90 مىڭ دوزا ەكپە سالىندى. جالپى، سوڭعى كۇندەرى 90-100 مىڭ ۆاكسينا سالىنىپ جاتىر. ياعني، ءبىز بۇل جۇمىستى كۇشەيتە تۇسەتىن بولامىز. قالاي بولعاندا دا كۇزدە 10 ميلليون ۆاكسينا سالىنادى دەپ جوسپارلاپ وتىرمىز. ارينە، ۆاكسينا سالدىرماعان، اۋرىپ تۇرعاننان كەيىن 6 ايدان استام ۋاقىت وتكەن ازاماتتار كەلىپ ۆاكسينا الاتىندىعىنا، قولداۋ كورسەتەتىندىگىنە ۇمىتتەنەمىز. ويتكەنى، وكىنىشكە وراي ادامدار ەكىنشى رەت قايتا اۋىرىپ قالىپ جاتىر. بىزگە قازاقستاندا كوروناۆيرۋس ينفەكسياسىنىڭ تولقىندى تارالۋى بولماۋى ءۇشىن قورعانۋ قاجەت»، - دەدى الەكسەي سوي.

اۆتور: مارلان جيەمباي


سوڭعى جاڭالىقتار