اعىلشىن ءتىلى وقۋلىعىندا شەت ەلدىڭ يدەولوگياسىن ناسيحاتتايتىن ماتىندەر بار - ماقپال تاجماعامبەتوۆا
«اعىلشىن ءتىلىن وقىتۋعا ارنالعان وقۋلىقتارعا ق ر ءبىلىم جانە عىلىم مينيسترلىگى تاراپىنان وڭ ساراپتاما بەرىلگەن. بۇل وقۋلىقتار «ەكسپرەسس پابليشين» باسپاسىنان باسىلىپ شىققان. سىرتقى مۇقاباسىندا اۋدارىلعان دەپ جازىلعانمەن، اۋدارما ەمەس. 2016 -جىلدان بەرى وسى باسپانىڭ قازاقستانداعى رەسمي وكىلى «EDU Stream» كومپانياسى شىعارىپ وتىرعان. وزگەشەلىگى - قازاقستان بالالارىنىڭ سۋرەتتەرىن پايدالانىپ تاقىرىپتى اشۋعا تىرىسقان. سانا- سەزىمى جاڭا قالىپتاسىپ كەلە جاتقان بۇلدىرشىنگە ارنالعان كەز كەلگەن وقۋلىق ۇلتتىق يدەولوگيا تۇرعىسىنان جاساقتالۋى كەرەك. ال بۇل كىتاپتاردان قازاقتىڭ ۇلتتىق ۇعىمىنا، ءداستۇرلى تاربيەسىنە كەلمەيتىن، شەتەلدىڭ يدەولوگياسىن ناسيحاتتايتىن يلليۋستراتسيالار مەن ماتىندەردى كوپتەپ كەزدەستىرۋگە بولادى»، - دەدى ماقپال تاجماعامبەتوۆا ۇكىمەت باسشىسىنىڭ ورىنباسارى ەرالى توعجانوۆتىڭ اتىنا جولداعان ساۋالىندا.
«ەكىنشى سىنىپقا ارنالعان وقۋلىقتا ۇلتتىق ءداستۇردىڭ قاتارىنا پاسحا مەن ماسلەننيتسانى ەنگىزىپتى. مۇنى ارينە، قازاقستاندىق مەرەكەلەر دەپ كورسەتسە تۇسىنۋگە بولادى. قازاقتىڭ سالت- داستۇرلەرى مەن ادەت- عۇرىپتارى دەپ جازىلعان تاقىرىپتا شىلدەحانا مەن بالانى قىرقىنان شىعارۋ سياقتى سالت- ءداستۇردىڭ جانىندا ءدىني مەرەكەلەر نەگە ءجۇر؟»، - دەدى دەپۋتات.
وسى ورايدا وقۋ باعدارلاماسىندا قاتەلىكتەر جىبەرگەن وقۋلىقتارعا قاتىستى ءتيىستى ۇسىنىستار ايتىلدى: بىرىنشىدەن، ءبىلىم جانە عىلىم مينيسترلىگى ءبىلىم باعدارلاماسىنا ەنگىزگەن اتالمىش اعىلشىن ءتىلى وقۋلىقتارىن قايتا ساراپتاپ، جىبەرىلگەن ورەسكەل قاتەلىكتەرگە جاۋاپكەرشىلىكتى كۇشەيتۋ سۇرالدى.
ەكىنشىدەن، وقۋلىق ازىرلەۋدە وعان ساراپتاما جۇرگىزۋ قاعيداتتارىن ءجىتى قاراپ، نورماتيۆتىك- قۇقىقتىق اكتىلەردىڭ تالاپتارىن ءبىلىم جانە تاربيە كومپونەنتتەرىنىڭ تۇتاستىعى اياسىندا كۇشەيتۋ قاجەت.
ۇشىنشىدەن، وقۋلىق قۇراستىرۋدا باسشىلىققا الاتىن ۇلگىلىك وقۋ باعدارلاماسىنا ساراپتاما جاسالىپ، باعدارلاما ازىرلەۋشى توپتىڭ قۇرامىن قايتا قاراۋ كەرەك. ساراپتامالىق كوميسسيا قۇرامىنا تەك اعىلشىن ءتىلى مۇعالىمدەرى ەمەس، بالالار پسيحولوگىنان باستاپ، سۋرەتشى پەداگوگ، ەتنوگراف، قازاق ءتىلى ماماندارى، ادەبيەتشىلەر تاعى دا باسقا مامانداردى ەنگىزۋ كەرەك.
تورتىنشىدەن، وقۋلىقتى باسىپ شىعارۋدا شەتەلدىك ەمەس، ءوز وتاندىق باسپالارىمىزدى قاراستىرۋ قاجەت. ۇلتتىڭ جاڭا بولمىسىن قالىپتاستىرۋ كەزەڭىندە مۇنداي وقۋلىقتار قازاقستاننىڭ بولاشاعىنا جاۋاپ بەرەتىن، ءوز وتانىن قادىرلەيتىن ۇرپاقتى تاربيەلەۋ ءۇشىن وتە ماڭىزدى.
اۆتور: رۋسلان عابباسوۆ