ەرتەڭ ا ق ش پەن رەسەي پرەزيدەنتتەرى كەزدەسەدى

نۇر- سۇلتان. قازاقپارات - دجو بايدەن مەن ۆلاديمير پۋتين ەكىجاقتى قاتىناستاردىڭ جاعدايى مەن بولاشاعى، ستراتەگيالىق تۇراقتىلىق ماسەلەسى مەن كۇن تارتىبىندە تۇرعان وزگە دە وزەكتى ساۋالداردى تالقىلايدى، دەپ حابارلايدى «حابار 24».

الەم كوز تىككەن شارادان اقپارات تاراتۋ ءۇشىن 44 ەلدىڭ 1200-دەن اسا ءتىلشىسى شۆەيساريا سىرتقى ىستەر مينيسترلىگىندە اككرەديتاتسيادان ءوتتى. اراسىندا ارنامىزدىڭ ەۋروپاداعى ءتىلشىسى جانات ەرنست تا بار.

ەل بيلىگى قاۋىپسىزدىك شارالارىن بارىنشا كۇشەيتتى. اسكەري- اۋە كۇشتەرى جەنيەۆانىڭ اۋە كەڭىستىگىن كۇزەتىپ ءجۇر. بۇگىننەن باستاپ ەرتەڭگى كەشكى بەسكە دەيىن سامميت وتەتىن اۋداندا اسپان جابىق بولادى. ال جەردەگى قاۋىپسىزدىكتى ءبىر مىڭنان اسا ءتارتىپ ساقشىسى قاداعالايدى. قالا اكىمشىلىگى تۇرعىنداردى سامميتكە بايلانىستى تۋىندايتىن قيىندىقتارعا تۇسىنىستىكپەن قاراۋعا شاقىردى.