نۇر- سۇلتاندا ەر ادام دۇكەن ساتۋشىسىن كەپىلگە الماق بولعان

نۇر- سۇلتان. قازاقپارات - ەلوردا دۇكەندەرىنىڭ بىرىنە ماس ادام قاراقشىلىق شابۋىل جاسادى، - دەپ حابارلايدى قازاقپارات ءتىلشىسى.

وقيعا بۇگىن تاڭعى ساعات 07.08-دە بولعان. پوليتسيانىڭ «102» ارناسىنا گوگول كوشەسىندەگى دۇكەنگە قاراقشىلىق شابۋىل جاسالعانى تۋرالى حابارلاما كەلىپ تۇسەدى. بەلگىسىز ەر ادام دۇكەنگە كىرىپ، ساتۋشىنىڭ ءبىرىن پىشاقپەن قورقىتىپ، سىرتقا شىعارىپ جىبەرگەن. ىشتە قالعان تاعى ءبىر ساتۋشىعا پىشاق كەزەنگەن ەر ادام دۇكەننىڭ كىلتىن تالاپ ەتكەن. كۇدىكتى دۇكەندى ىشتەن جاۋىپ جاتقاندا ساتۋشى دابىل تۇيمەسىن باسىپ ۇلگەرەدى. حابار كەلگەن بويدا پوليتسيا قىزمەتكەرلەرى، جەدەل مەديتسينالىق جاردەم مەن توتەنشە جاعداي وكىلدەرى وقيعا ورنىنا اتتانادى.

«دۇكەن جەكە تۇرعان ەكى قاباتتى عيماراتتىڭ ءبىرىنشى قاباتىندا ورنالاسقان بولاتىن. پوليتسەيلەر جاعدايدى باعالاپ، ەر اداممەن كەلىسسوز جۇرگىزە باستادى. ول ءوزىن وتە دورەكى مىنەز كورسەتتى جانە ماس ەكەنى كورىنىپ تۇردى. كۇدىكتى قولىنداعى اس ءۇي پىشاعىمەن ءوزىن جانە ساتۋشىنى جاراقاتتايمىن دەپ قورقىتتى. كەلىسسوز بىرنەشە مينۋتقا سوزىلدى، ويتكەنى ساتۋشىنىڭ ومىرىنە قاۋىپ ءتونىپ تۇرعان ەدى. بۇل كەزدە پوليتسيانىڭ ارنايى جاساعى دۇكەنگە ەكىنشى كىرەبەرىستەن كىرىپ جاتقان. كۇدىكتى كەلىسسوزگە اينالعان كەزدە ساتۋشى ونىڭ قولىنان بوساپ ۇلگەردى. وسى كەزدە پوليتسەيلەر كۇدىكتىنى قولعا ءتۇسىردى. 31 جاستاعى جىگىت وقيعا اراسىندا كەۋدەسىن پىشاقپەن جارالاپ ۇلگەردى. وعان العاشقى مەديتسينالىق كومەك كورسەتىلىپ، اۋرۋحاناعا جەتكىزىلدى»، - دەپ جازادى نۇر- سۇلتان قالاسى پوليتسيا دەپارتامەنتىنىڭ باسپا ءسوز قىزمەتى.

اتالعان وقيعا بويىنشا قىلمىستىق ءىس قوزعالىپ جاتىر.

اۆتور: ەسىمجان ناقتىباي