باتىس قازاقستان تۇرعىنىنان گراناتا، مىلتىق، قىلىش جانە ءدىني كىتاپتار تاركىلەندى

ورال. قازاقپارات - باتىس قازاقستان وبلىسىندا «قارۋ» جەدەل الدىن الۋ ءىس- شاراسى اياسىندا شارۋا قوجالىعى باسشىسىنان گراناتا، مىلتىق، وق- ءدارى، پىشاق، قىلىش، سونداي- اق ءدىني كىتاپتار تاركىلەندى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتى ءمالىم ەتكەنىندەي، قازىرگى كەزدە تاسقالا اۋدانىنداعى شارۋا قوجالىعىنىڭ باسشىسى، 1966 -جىلعى ا- عا قاتىستى ق ر ق ك 287-بابى 3-بولىگىنە (زاڭسىز قارۋ ساقتاۋ) سايكەس قىلمىستىق ءىس قوزعالدى. انىقتالعانىنداي، ا. بۇرىن رەسەي فەدەراتسياسىنىڭ باس بوستاندىعىنان ايىرۋ ورىندارىندا جازاسىن وتەپ، مەرزىمىنەن بۇرىن بوساعان. سودان كەيىن 2016 -جىلى قازاقستاندا ۇرلىق جاساعانى ءۇشىن باس بوستاندىعى شەكتەلگەن.

دەپارتامەنت باستىعى، پوليتسيا گەنەرال- مايورى ماحسۇدحان ابلازيموۆتىڭ ايتۋىنشا، كۇنى بۇگىن كۇدىكتى كوۆيد جانە ەكىجاقتى پنيەۆمونيا دياگنوزىمەن ستاتسيوناردا جاتقاندىقتان، ودان جاۋاپ الۋ، تەرگەۋ يزولياتورىنا اۋىستىرۋ ازىرگە مۇمكىن ەمەس.

«ا- نىڭ تۇرعىلىقتى مەكەنجايىن ءتىنتۋ بارىسىندا تىركەلمەگەن «MAVERIC»مىلتىعى (ۆينچەستەر)، 12 كاليبرلى مىلتىقتىڭ 11 وق- ءدارىسى، 3 پىشاق (قانجار)، كالاشنيكوۆ اۆتوماتىنىڭ 1 وق- ءدارىسى، مىلتىق تازالايتىن قۇرال تاركىلەندى. سونىمەن قاتار ءدىني كىتاپتار مەن داپتەر تابىلدى. وعان قوسا ونىڭ شارۋا قوجالىعىن ءتىنتۋ كەزىندە ءبىر اسكەري گراناتا، ماكاروۆ تاپانشاسىنىڭ 16 دانا وق- ءدارىسى، كالاشنيكوۆ اۆتوماتىنىڭ 3 دانا وق- ءدارىسى، «لوس-7» شولاق مىلتىعى، قىلىش، 6 دانا ءدىني كىتاپ تاركىلەندى»، دەدى م. ابلازيموۆ.

ا- عا وسىنشاما قارۋ- جاراقتىڭ نەگە قاجەت بولعانى تەرگەۋ بارىسىندا انىقتالادى.

اۆتور: ەلجان ەرالى