الماتىلىق ەكولوگتار دابىل قاعۋدا

None
None
نۇر-سۇلتان.قازاقپارات - الماتى اۋاسىنىڭ لاستانۋىنىڭ 57 پروتسەنتى اۆتوكولىكتەرگە تيەسىلى. ەكولوگتاردىڭ مالىمەتىنشە، كۇنىنە ماشينالاردان اۋاعا 110 توننا زياندى قالدىق تارايدى ەكەن.

ماماندار مۇنىڭ اۋىر سالدارىن ايتىپ دابىل قاعۋدا. ال مەگاپوليستىڭ باسشىسى ەكولوگيالىق تالاپقا ساي كەلمەيتىن تەحنيكا يەلەرىنە جازانى قاتاڭداتۋدى سۇراپ وتىر. الماتىدا قازىر رەسمي تىركەلگەن كولىكتەردىڭ سانى 500 مىڭنان اسادى. بۇعان كۇندەلىكتى سىرتتان كەلىپ- كەتەتىن كولىكتەردى قوسىڭىز. اسىرەسە، بەنزين جانە ديزەل وتىنىمەن جۇرەتىن قوعامدىق كولىكتەردىڭ اۋانى لاستاۋداعى «ۇلەسى زور».

جانات ءالىمجانوۆا، قالا تۇرعىنى:

- الماتىدا كارانتين كەزىندە اسپان اشىلىپ، تىپ- تىنىش بولىپ، ءتۇتىننىڭ ءيىسى باسىلىپ، تازارىپ قالدى. ەندى كوبىندە وسى كولىكتەردەن عوي ەكولوگيانىڭ بىلعانىپ جاتقانى.

ەكى اي بويى جۇرگىزىلگەن تەكسەرۋلەر بارىسىندا قالادا تىركەلگەن اۆتوكولىكتەردىڭ 11 پروتسەنتى، ال سىرتتان كەلەتىن ترانسپورتتىڭ 12,6 پروتسەنتى ەكولوگيالىق نورماعا ساي كەلمەيتىنى انىقتالعان. جۇك كولىكتەرىنىڭ 29 پروتسەنتى اۋاعا زياندى قالدىقتاردى شىعاراتىنى بەلگىلى بولعان.

ەركىن جايلاۋبەكوۆ، ت ك-65 تەحنيكالىق كوميتەتىنىڭ ءتوراعاسى، ەكولوگ:

- مەنىڭ ەسەبىم بويىنشا، كۇنىنە 110 توننا زياندى قالدىق شىعادى اۆتوكولىكتەن. ەسكى ماشينالاردى الىپ تاستاساق، جەتپىس پروتسەنتكە ازايتادى ەكەنبىز. ەڭ ءبىرىنشى جول - بۇل ەلەكتروبۋستار. ارينە، ول قيىن جول. كوپ ۋاقىتتى كەرەك ەتەتىن جول. اۆتوبۋستاردى، قالانىڭ ىشىندە ىستەيتىن اۆتوكولىكتەردى گازعا كوشىرۋ. تابيعي گازعا، اناداي مۇناي گازعا ەمەس، تابيعي گازعا.

قالا بيلىگى، تالاپقا ساي كەلمەيتىن كولىكتەردىڭ ەمىن- ەركىن ءجۇرۋى ايىپپۇلدىڭ ازدىعىنان دەپ وتىر. سوندىقتان، ايىپپۇل كولەمىن ارتتىرۋ كەرەك. قازىرگى ۋاقىتتا قالادا 9 ەكولوگيالىق بەكەت ورناتىلعان. جىل سوڭىنا دەيىن تاعى 10 ەكوپوست ىسكە قوسىلادى.

ءلايلا مۇحامەدراحيموۆا، ەكوجۇيەلەردى ءتيىمدى باسقارۋ قىزمەتىنىڭ باسشىسى:

- ناۋرىز ايىنان باستاپ 45 مىڭعا جۋىق كولىك تەكسەرىلدى. سونىڭ 5237 سىنە پروتوكول تولتىرىلدى. ياعني ەكولوگيالىق نورماعا سايكەس كەلمەيدى دەپ تولتىرىلدى. قالا ىشىندە شەكتەۋ قويۋ، ەكولوگيالىق نورماعا سايكەس كەلمەيتىن كولىكتەرگە شەكتەۋ قويۋ سياقتى قازىرگى تاڭدا پوستانوۆلەنيەنىڭ جوباسى قاراستىرىلىپ جاتىر.

الماتىداعى قوعامدىق كولىك جۇيەسىندەگى 2,5 مىڭعا جۋىق اۆتوبۋستىڭ 1715 ءى ديزەلمەن جۇرەدى. قالا اكىمدىگى اۆتوبۋس پاركتەرىنە الداعى ۋاقىتتا مۇنداي اۆتوبۋستاردى ساتىپ الۋعا تىيىم سالدى. قوعامدىق كولىكتەر تەك گازبەن نەمەسە ەلەكتر قۋاتىمەن قوزعالاتىن بولادى.

www.24.kz

سوڭعى جاڭالىقتار