دىنمۇحامەد قونايەۆقا ارنالعان ءبىلىم بايقاۋى مارەسىنە جەتتى

None
None
تالدىقورعان. قازاقپارات - الماتى وبلىسىندا اسا كورنەكتى مەملەكەت جانە قوعام قايراتكەرى، تەحنيكا عىلىمدارىنىڭ دوكتورى دىنمۇحامەد قونايەۆتىڭ ءومىرى مەن ەڭبەكتەرىن دارىپتەۋگە ارنالعان ونلاين- بايقاۋ ءوتتى، دەپ حابارلايدى قازاقپارات ءتىلشىسى.

«ادالدىق پەن ىزگىلىك جولى» تاقىرىبىنا ارنالعان بىلىمدىلەر دوداسى 4-28-مامىر ارالىعىندا ءوتتى. نەگىزگى ماقساتى - ۇلى تۇلعا دىنمۇحامەد قونايەۆتىڭ ءومىرى مەن ەڭبەكتەرىن جاس ۇرپاققا تانىستىرۋ، سونىمەن بىرگە پەداگوگتار اراسىندا عىلىمي- ىزدەنىس جۇمىستارىن جۇرگىزۋ، وقۋشىلاردى جازبا جۇمىستارىنا باۋلۋ ارقىلى زياتكەرلىك جانە شىعارماشىلىق قابىلەتتى دامىتۋ. ءبىلىم باسەكەسىنە وقۋشىلاردان – 63، ۇستازدار قاۋىمىنان 18 ءوتىنىم قابىلدانعان. وقۋشىلار د. قونايەۆتىڭ ءومىرى مەن ەڭبەكتەرى تۋرالى ەسسە جۇمىستارىن جازسا، پەداگوگتار عىلىمي جوبالارىن قورعادى. ايتا كەتەيىك، بايقاۋعا 8-10 سىنىپ وقۋشىلارىنىڭ 27 جۇمىسى ىرىكتەلىپ الىنسا، ۇستازدار اراسىندا 7 عىلىمي جوبا سىننان سۇرىنبەدى.

«شيرەك عاسىر ەل باسقارعان كەمەل ادامنىڭ وتكەنى مەن ارتىندا قالعان دارا جولىن وسكەلەڭ ۇرپاق ءبىلۋى ءتيىس. بۇگىن مارەسىنە جەتكەن دودانىڭ نىساناعا العانى دا وسى ەدى. سوندىقتان، سايىس قونايەۆ اتىنداعى حالىقارالىق قورىنىڭ دەمەۋشىلىك قولداۋىمەن ۇيىمداستىرىلدى. اتالعان شاراعا اۋداندىق، قالالىق جانە وبلىستىق مامانداندىرىلعان ءبىلىم بەرۋ ۇيىمدارىنىڭ وقۋشىلارى مەن پەداگوگتارى قاتىستى. كەلىپ تۇسكەن شىعارمالار مەن جوبالاردى قازاق ۇلتتىق ۋنيۆەرسيتەتىنىڭ ۇستازدارى مەن باق سالاسىندا ەڭبەگى سىڭگەن تۇلعالار ساراپقا سالدى»، - دەيدى دىنمۇحامەد قونايەۆ اتىنداعى حالىقارالىق قوردىڭ رەسمي وكىلى باقتىعالي ساقىمقوجا ۇلى.

سوڭعى جاڭالىقتار