ىلە الاتاۋىندا ورنالاسقان سەگىز مۇزدىق كول الماتىعا قاۋىپ ءتوندىرۋى مۇمكىن
وسىعان بايلانىستى توتەنشە جاعدايلار دەپارتامەنتى مەن «قازسەلدەن قورعاۋ» مەكەمەسى سەلدىڭ الدىن الۋعا باعىتتالعان شارانى باستاپ كەتتى. جۇمىس بارىسىندا ماماندار جاز بويى سۋ كولەمىن قاۋىپسىز دەڭگەيگە جەتكەنشە بىرتىندەپ تومەندەتەدى.
قارلىعاش قايىپبەكوۆا، ءتىلشى:
- سولتۇستىك تيان- شان تاۋلارىندا سەل ءجۇرۋ قاۋپى ءدال وسى مەزگىلدە ارتا تۇسەدى. بيىل دا سولاي. ونىڭ ۇستىنە سوڭعى ەكى اپتا جاۋىن- شاشىندى بولدى. دەسە دە، مۇنداعى جاعدايدى ماماندار ءوز باقىلاۋىندا ۇستاپ وتىر. ولاردىڭ ايتۋىنشا، ونداعى مۇزدىق كولدەردىڭ 8 ءى الماتىعا قاۋىپ توندىرەدى. سەبەبى، ولار تاۋلى جەردىڭ جوعارعى جاعىندا ورنالاسقان. ونىڭ ۇستىنە ونداعى سۋ دەڭگەيى ۇنەمى وزگەرىپ وتىرادى. اعىپ كەتۋ قاۋپى دە بار. ماسەلەن، مىنا تابيعي سۋ قويماسى «13-بيس» دەپ اتالادى. مۇزدىق كۇمبەل وزەنىنەن جوعارى جاتىر. ال، تومەندە ۇلكەن الماتى وزەنى وتەتىن شاتقال بار.
قازىر الماتىدا اۋا تەمپەراتۋراسى +30 گرادۋس بولسا، مۇندا 0 گرادۋس شاماسىندا. تەڭىز دەڭگەيىنەن 3600 مەتر بيىكتىكتە ورنالاسقان تاۋ باسىندا ءالى قار جاتىر. مۇنداعى مۇزدىقتار تەك ەكى اپتادان سوڭ ەري باستايدى. الماتىنىڭ تاۋلى ايماعىندا 45 مۇزدىق پەن كول بار.
سامات داۋلەنحانوۆ، «قازسەلدەن قورعاۋ» م م الماتى قالالىق پايدالانۋ باسقارماسى فيليالىنىڭ باسشىسى:
- كولدەردىڭ دەڭگەيىن ءتۇسىرۋ جۇمىستارىنا 2 مەردىگەر كومپانيادان 90 ادامداي جۇمىلدىرىلىپ جۇمىس ىستەيدى. 1554 تاۋلى ايماقتاردا «قازسەلدەنقورعاۋ» مەكەمەسىنىڭ قۇرىلعان 20 گيدروپوستى بار. بارلىعى كولدەردەن كەلىپ جاتقان كولگە قوسىلىپ جاتقان سۋلاردىڭ لايلىلىعىن تۇگەل ەسەپتەيدى. گيدروپوستار تومەن جاقتا ديسپەتچەرگە حابارلار بەرىپ وتىرامىز. وسى قوندىرعىلار مۇزدىق كولدەگى ارتىق سۋدى سورىپ الۋعا ارنالعان. وعان ديامەترى 300 م م بولاتىن ارنايى پلاستيكالىق قۇبىرلار قولدانىلادى. مۇزدىعى ەريدى دەپ قاۋىپتەنگەن كولدەرگە ساعاتىنا 400 تەكشە مەتر سۋ سوراتىن 9 قۇرىلعى ورناتىلادى. وعان قوسا، تاۋ باسىندا كولدەردىڭ جاعدايىن باقىلاپ وتىراتىن 21 ماۋسىمدىق بەكەت اشىلادى.
ەرلان الىبەكوۆ، قالالىق ت ج د باسشىسىنىڭ ورىنباسارى:
- بارلىعى 10 ستانتسيا قويىلدى. بيىل ونىڭ سانى 21 گە جەتكىزىلمەك. وعان قوسا، سەل قاۋپىنىڭ اۆتوماتتاندىرىلعان مونيتورينگ جۇيەسى ناقتى ۋاقىت رەجيمىندە گيدرومەتەورولوگيالىق جاعدايدى، كولدەردى باقىلاۋدى قاشىقتان قامتاماسىز ەتۋگە مۇمكىندىك بەرەدى. ال، ديسپەچەرلىك بەكەتتەر وسىعان جاۋاپتى سالا وكىلدەرىنە مۇزدىقتار مەن كولدەردەگى، وزەندەردەگى سۋ دەڭگەيىن كۇندىز- ءتۇنى باقىلاۋدا ۇستاپ وتىرادى.
سەلدىڭ الدىن الۋ شارالارىنا توتەنشە جاعدايلار مينيسترلىگىنىڭ اۋە تەحنيكاسى تارتىلادى. تاۋ باسىنا مامانداردى ارنايى تەحنيكا مەن قاجەتتى قۇرال جابدىقتار تەك تىكۇشاقپەن جەتكىزىلەدى. ياعني، «قازاۆياقۇتقارۋ» ۇشقىشتارى ءۇشىن قاۋىرت كەزەڭ باستالدى.