قازاقستاندا اۋا مەن سۋدىڭ لاستانۋ ماسەلەسى قالاي شەشىلەدى - مينيستر ەسەبى

None
None
نۇر- سۇلتان. قازاقپارات – ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ۇكىمەت وتىرىسىندا وڭىرلەردەگى ەكولوگيالىق پروبلەمالاردى شەشۋ شارالارىن باياندادى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، قازىرگى ۋاقىتتا وڭىرلەردىڭ نەگىزگى ەكولوگيالىق پروبلەمالارى: اۋانىڭ، جەر ءۇستى سۋلارىنىڭ لاستانۋى جانە قالدىقتارمەن جۇمىس ىستەۋدىڭ جەتىلمەگەن جۇيەسى بولىپ وتىر.

«اتموسفەرالىق اۋانىڭ ەكولوگيالىق مونيتورينگىنە سايكەس، وتكەن جىلدىڭ قورىتىندىسى بويىنشا 45 ونەركاسىپتىك قالا مەن مەگاپوليستىڭ ىشىنەن 10 قالا اتموسفەرالىق اۋانىڭ جوعارى لاستانۋ دەڭگەيىنە جاتادى. لاستاۋشى زاتتاردىڭ شىعارىندىلارىنىڭ جالپى كولەمى 2,5 ميلليون توننانى قۇرادى. جەرۇستى سۋلارىنىڭ لاستانۋىنىڭ نەگىزگى سەبەپتەرىنىڭ ءبىرى - ەسكىرگەن كارىزتازارتۋ نىساندارى. بىلتىر رەسپۋبليكا بويىنشا لاستاۋشى زاتتار توگىندىلەرىنىڭ جالپى كولەمى 1,1 ميلليون توننانى قۇرادى»، - دەدى ماعزۇم مىرزاعاليەۆ.

سونىمەن بىرگە، ءوندىرىس جانە تۇتىنۋ قالدىقتارىمەن جۇمىس ىستەۋ پروبلەماسى دا شەشىلمەي تۇر. اتاپ ايتقاندا قاتتى تۇرمىستىق قالدىقتار پوليگوندارىنىڭ سانيتارلىق جانە ەكولوگيالىق تالاپتارعا سايكەس كەلمەۋى، ولاردى وڭدەۋ دەڭگەيىنىڭ تومەندىگى جانە اپاتتى ۇيىندىلەر بار.

مينيسترلىك «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا ەكولوگيالىق پروبلەمالار مەن ولاردى جۇرتشىلىقپەن، اسىرەسە، بارلىق وڭىرلەردەگى ەكو- بەلسەندىلەرمەن تالقىلاپ، شەشۋ جولدارىن قاراستىرعان.

«جۇرتشىلىقپەن، اكىمدىكتەرمەن جانە تابيعات پايدالانۋشىلارمەن بىرلەسىپ 17 جول كارتاسى ازىرلەندى. بارلىعى 485 شارا قاراستىرىلعان. 2021 -جىلى 95 شارا وتكىزۋ جوسپارلانعان. بيىلعى ءبىرىنشى توقساندا جالپى 70 شارا كوزدەلگەن بولاتىن. ونىڭ ىشىندە 42 شارا ورىندالىپ، 28 ءى ورىندالماعان. 2025 -جىلعا قاراي جول كارتالارىن ىسكە اسىرۋ 10 قالادا اتموسفەرانىڭ لاستانۋ يندەكسىن جوعارىدان ورتاشا دەڭگەيگە تومەندەتۋگە مۇمكىندىك بەرەدى. بۇل اتموسفەرالىق اۋانىڭ جاي- كۇيىن جاقسارتۋعا ىقپال ەتەدى. ودان باسقا، 7 كارىزتازارتۋ نىساندارى مەن 24 جاڭا پوليگون سالىنادى. 12 كارىزتازارتۋ نىساندارى قايتا جاڭعىرتىلادى. سونداي- اق تاريحي لاستانعان جەرلەردى قالپىنا كەلتىرۋ جانە جويۋ جۇمىستارى جۇرگىزىلەدى»، - دەپ ءتۇسىندىردى ەكولوگيا ءمينيسترى.


سوڭعى جاڭالىقتار