ەلىمىزدە كارتوپ پەن ءسابىز قاشان ارزاندايدى؟

نۇر-سۇلتان.قازاقپارات - ەلدە كارتوپ باعاسى ارزانداۋى ءتيىس. كوپ ۇزاماي ىشكى نارىققا پاۆلودارلىق ءونىم جەتكىزىلەدى. كارتوپپەن بىرگە ءسابىزدىڭ دە باعاسى تومەندەيدى.

بۇل ەلوردانىڭ كوتەرمە ساۋدا ورىنى. تاڭسارىدەن قاربالاس. تىكەلەي وندىرۋشىدەن اكەلىنگەن ءونىم ەڭ الدىمەن الىپساتارلاردىڭ قولىنا ءتيىپ جاتىر. ولار وسى جەردەن كارتوپ، پياز، ءسابىزدى توننالاپ اكەتەدى. سوسىن قالاداعى بولشەك ساۋدا ورىندارىنا جەتكىزەدى.

ءۇمىتجان ەلتايەۆ، كاسىپكەر:

- ءبىز ءوزىمىز ساتىپ الۋشىمىز، پوليادان ساتىپ الامىز. پوليادا 200-220-دان بولىپ جاتىر. قازىر 260 تان ساتىپ جاتىرمىز. ءيا، بىزدەن وسى باعادا الىپ، قالاعا اپارىپ قوسىپ ساتادى. كارتوپتىڭ كەلىسى مۇندا 270 تەڭگە. ءبىر اپتا بۇرىن باعا ەكى ەسە قىمبات بولاتىن. ول كەزدە وندىرۋشىلەردە كارتوپ دا تاپشى ەدى. قازىر ءونىم بار. تۇركىستاننان ءبىراز كارتوپ جەتكزىلگەن.

بليتس:

- 250 تەڭگەدەن ءبىر پاكەت عانا الدىم. ءبىزدىڭ ءۇي جاقتا 350، مىنا جەردە 250.

ال ءسابىزدىڭ قۇنى ازىرگە اسپانداپ تۇر. وعان دا ىشكى نارىقتاعى تاپشىلىق سەبەپ. سورەدەن تەك شەتەلدىك ءونىمدى كورەسىز.

راۋان مىڭبايەۆ، ءتىلشى:

- بىزدەگى بازارداعى ءونىمنىڭ كوبى شەتەلدەن اكەلىنگەن. ماسەلەن، مىنا ءسابىز قىرعىزستاننان اكەلىنىپ جاتىر. كەلىسى 500 تەڭگە. وسىدان- اق قالاداعى قىمباتشىلىقتى اڭعارا بەرۋگە بولادى. سەبەبى ءبىز تۇرعان جەر كوتەرمە ساۋدا ورىنى. وسى جەردەن دەلدالدار ساتىپ الىپ كەتەدى. قاپتاپ. ونىڭ ۇستىنە تاعى باعا قوسىپ، دۇكەندەرگە، ياعني بولشەك ساۋدا ورىندارىنا ۇسىنادى. اۋىل شارۋاشىلىعى مينيسترلىگى كوكونىس ماسەلەسى تاياۋ ارادا شەشىمىن تابادى دەيدى. ەلدەگى شارۋالار القاپتان ونىمدەرىن جيناپ، كوتەرمە ساۋدا ورىندارىنا جەتكىزۋى ءتيىس.

ساۋلەت تۇرسىنباي، كاسىپكەر:

- ءسابىز ءالى شىققان جوق. ەندى ءبىر جۇمادا بولادى. سول كەزدە باعاسى تۇسەدى. ۋاقىتشا قىمبات ەدى. كارتوشكا ارزانداپ جاتىر مىسالى. 1-2 جۇمادا 150 گە تۇسەدى. جالپى بيىل ەگىنشىلەر ءبىراز قيىندىققا تاپ بولدى. شىعىن كوپ.

نازگۇل حاتەپوۆا، ق ر اۋىل شارۋاشىلىعى مينيسترلىگى دەپارتامەنتى ديرەكتورىنىڭ ورىنباسارى:

- بيىل جاعدايدا بارلىق نارسە قىمباتتاۋدا. ەلەكتر ەنەرگياسى، تاسىمالداۋ، تاس جولدار دا اقىلى بوپ جاتىر. شىعىنداردىڭ كوبەيگەنى راس. قازىر الدىڭعى 1-2 اپتادا جاعداي تۇراقتالادى دەپ ۇمىتتەنەمىز.

جاۋاپتى ماماندار الداعى اپتا جاعداي تۇراقتالادى دەپ سەندىردى. تاپشىلىق تەك ماۋسىمدىق جاعداي. كوپ ۇزاماي سولتۇستىك وڭىرلەردىڭ دە ءونىمى كەلىپ جەتەدى. سوندىقتان كارتوپ باعاسى 150 تەڭگەگە دەيىن ارزانداۋى ءتيىس.

www.24.kz