كارتوپ باعاسىنىڭ قىمباتتاۋىنا نە سەبەپ؟

None
None
نۇر-سۇلتان. قازاقپارات - قازاقستاندا كارتوپ جەتكىلىكتى: وڭىرلەردىڭ جەدەل دەرەكتەرىنە سايكەس، 11- ماۋسىمداعى جاعداي بويىنشا رەسپۋبليكادا 70 مىڭ توننادان استام الەۋمەتتىك ماڭىزى بار ازىق-تۇلىك قورى بار، دەپ حابارلايدى قازاقپارات اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.

بەلگىلەنگەن تۇتىنۋ نورمالارىنا سايكەس، ەلدەگى كارتوپ قورى جارتى ايدان استام ۋاقىتقا جەتەدى (حالىقتىڭ جان باسىنا شاققاندا جىلىنا 95 كەلى نورما بولعاندا، ەلىمىزدىڭ حالقى كۇنىنە 4,9 مىڭ توننا كارتوپ تۇتىنادى) . ايتا كەتۋ كەرەك، بۇل - ەلدەگى كارتوپ قورىن ەسەپتەگەندە شاعىن فەرمەرلەردەگى جانە حالىقتىڭ جەكە قوسالقى شارۋاشىلىقتارىنداعى ساقتالعان كارتوپ قورىنىڭ نەگىزگى كولەمىن (شامامەن %80) ەسپتەمەگەندەگى كورسەتكىش.

قازىرگى باعالارعا قاتىستى: كۇندەلىكتى باعا مونيتورينگى كارتوپقا بولشەك ساۋدا باعاسى 138-450 تەڭگە/كگ ارالىعىندا بولاتىنىن كورسەتەدى. بۇگىنگى تاڭدا ەڭ تومەن باعا قوستاناي (138 تەڭگە /كەلى) جانە اقتوبە وبلىستارىندا (166 تەڭگە)، ال ەڭ جوعارعىسى نۇر-سۇلتان قالاسىندا (225-450 تەڭگە)، س ق و (320-340 تەڭگە)، ش ق و (335 تەڭگە) جانە قاراعاندى وبلىسىندا (270-310 تەڭگە) تىركەلگەن.

ەلوردالىق بازارلار مەن ساۋدا نىساندارىنىڭ مونيتورينگى بۇگىنگى كۇنى كارتوپقا دەگەن سۇرانىس جوق ەكەنىن كورسەتتى. اسسورتيمەنتتە بىلتىرعى جىلعى دا، جاڭا داقىلدىڭ كارتوپتارى دا بار جانە ساتىلىپ جاتىر.

سونىمەن قاتار، تاۋارلاردىڭ جەتكىلىكتى بولۋىنا بايلانىستى باعا تومەندەپ كەلەدى. وتكەن جىلعى كارتوپ ساپاسىنا قاراي، كەلىسى 120 تەڭگەدەن 200 تەڭگەگە دەيىن ساتىلادى. بيىلعى ءونىم ەلورداداعى «شارىن» جانە «شاپاعات» ساۋدا ورتالىقتارىندا 280-320 تەڭگەدەن، «ەۆرازيا»، «ماگنۋم» جانە «سمول» س و و- دا كەلىسى 400-450 تەڭگەدەن ساتىلادى.

ۇلتتىق ستاتيستيكا بيۋروسىنىڭ مالىمەتى بويىنشا، جىل باسىنان بەرى كارتوپتىڭ قۇنى %48,6 عا ءوستى. بۇل ءوسىم ماۋسىمدىق سيپاتقا يە.

مىسالى، 2020-جىلى ءدال وسى كۇنى ستاتيستيكا ورگاندارى %46 عا جۋىق وسكەنىن تىركەگەن.

جاعدايدى تالداۋ ماۋسىمدىق باعانىڭ وسۋىنە دەلدالدار مەن ساۋدا وبەكتىلەرىنىڭ ۇستەمەنى كوپ قوسقانى اسەر ەتكەنىن كورسەتىپ وتىر. ايتا كەتۋ كەرەك، ماۋسىم ايىنان باستاپ وڭتۇستىك ايماقتاردا ەرتە پىسەتىن كوكونىستەر مەن كارتوپتىڭ جاڭا ءونىمى جاپپاي جينالا باستادى.

مۇندا بيىلعى كارتوپتىڭ باعاسى تونناسىنا 175-200 مىڭ تەڭگە ارالىعىندا. جاقىن ارادا جاڭا ونىمدەردى جەتكىزۋ نارىقتاعى باعاعا ەداۋىر وڭ اسەر ەتۋى مۇمكىن. وسىعان بايلانىستى وڭىرلەردىڭ جەرگىلىكتى اتقارۋشى ورگاندارىنا ەرتە پىسەتىن كارتوپتى تۇركىستان وبلىسىنان ساتىپ الۋ ۇسىنىلادى. بيىلعى كارتوپتى نۇر- سۇلتان جانە الماتى قالالارىنىڭ نارىعىنا جەتكىزۋدى ۇيىمداستىرۋ ءۇشىن وپەراتور رەتىندە «ازىق-تۇلىك كورپوراتسياسى» ۇ ك» ا ق- نى ىسكە قوسۋ قاجەت.

سونداي-اق، اكىمدىك اۋىل شارۋاشىلىعى ونىمدەرىن قولجەتىمدى باعامەن جەتكىزە وتىرىپ، جارمەڭكەلەر ۇيىمداستىرۋ ۇسىنىلادى.

سوڭعى جاڭالىقتار