ەڭبەك ءمينيسترى جۇمىسسىزدىق دەڭگەيىنە قاتىستى تۇسىنىك بەردى

نۇر- سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جۇمىسسىزدىق دەڭگەيىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندەگى باسپا ءسوز قىزمەتىندە كوروناۆيرۋس ىندەتىنىڭ تارالۋىنا بايلانىستى جۇمىسسىزدىق دەڭگەيى تۋرالى سۇراق قويىلدى.

«توتەنشە جاعداي مەن كارانتين كەزىندە كەيبىر وندىرىستەردە جۇمىس ورىندارىن توقتاتۋعا تۋرالى كەلدى. وسىعان بايلانىستى ازاماتتار وزدەرىنىڭ جۇمىستارىن قويىپ، ۇيلەرىندە وتىراتىن بولدى. بۇل تۇرعىدا مەملەكەت تاراپىنان اۋقىمدى داعدارىسقا قارسى باعدارلاما قابىلدانىپ، ءتيىستى جول كارتاسى ىسكە اسىرىلدى. وسىنىڭ اياسىندا بىلتىردىڭ وزىندە 239 مىڭ جاڭا جۇمىس ورنى قۇرىلدى. ونىڭ اراسىندا ۋاقىتشا ءارى تۇراقتى جۇمىس ورىندارى بار. بۇل جۇمىس ورىندارىنا تارتۋ ارقىلى بىلتىر جۇمىسسىزدىقتى 4,9 پايىز دەڭگەيىندە ساقتاۋعا مۇمكىن بولدى. ەگەر وسى شارالار دەر كەزىندە قابىلدانباسا، جۇمىسسىزدىق دەڭگەيى جوعارى بولۋى ىقتيمال»، - دەدى س. شاپكەنوۆ.

ونىڭ ايتۋىنشا، قازىرگى كەزدە ەلىمىزدە جۇمىسسىزدىق 4,9 پايىز دەڭگەيىندە قالىپ وتىر. سونىمەن قاتار باسپا ءسوز ءماسليحاتىندا جاز كەزىندە قانشا ادام جۇمىسىنان ايىرىلۋى مۇمكىن دەگەن سۇراق قويىلدى. ءوز كەزەگىندە مينيستر الداعى جازعى كەزەڭگە جۇمىسسىزدىق كوبەيمەيتىنىن، سەبەبى قازىر ەكونوميكا قالپىنا كەلىپ جاتقانىن جانە ەڭبەك نارىعىنا وڭتايلى اسەر ەتىپ جاتقانىن ايتتى.

«جازعى كەزەڭدە جۇمىسپەن قامتىلۋ دەڭگەيى ارتادى. بۇل رەتتە اۋىل شارۋاشىلىعى، قۇرىلىس سەكىلدى جازدا جانداناتىن ءداستۇرلى سالالار بار. سوندىقتان ءبىزدىڭ ءمينيسترلىڭ جازعى كەزەڭدە جۇمىستان بوساتۋ ءۇردىرىسىن بولجاپ وتىرعان جوق»، - دەدى س. شاپكەنوۆ.

ەسكە سالا كەتەيىك، قازاقستاندا 2020 -جىلى جۇمىسسىزدىق دەڭگەيى % 4,9 قۇرادى. بۇعان دەيىن حابالانعانداي، قازاقستان پاندەميا كەزىندە قولداۋ شارالارىنا 15 ميلليارد دوللاردان استام قارجى بولگەن.

اۆتور: رۋسلان عابباسوۆ