مالى جوق جانە قايتىس بولعانداردىڭ اتىندا جايىلىم جەرلەر تىركەلگەن

تاراز. قازاقپارات - جامبىل اۋدانى اكىمدىگىندە جايىلىم جەر ماسەلەسى جونىندەگى وبلىستىق پروكۋراتۋرامەن بىرلەسكەن القا ءماجىلىسى ءوتتى، دەپ حابارلايدى قازاقپارات ءتىلشىسى.

جيىندى وبلىس پروكۋرورى نۇرعالىم ءابدىروۆ اشىپ، بۇگىنگى تاڭدا پايدالانىلماي وتىرعان اۋىل شارۋاشىلىعى ماقساتىنداعى ەگىستىك جەرلەر مەن جايىلىمداردى مەملەكەت قورىنا قايتارۋ باعىتىندا اتقارىلىپ جاتقان جۇمىستارعا قىسقاشا توقتالدى.

جالپى وڭىردەگى پايدالانىلماي جاتقان جايىلىمدىق جەرلەردى انىقتاۋ، ريەۆيزيا جۇرگىزۋ، مەملەكەت قورىنا قايتارۋ بويىنشا جۇمىستار بارىسى تۋرالى وبلىس پروكۋرورىنىڭ ورىنباسارى نۇربەك ۇلاسبەك ۇلى باياندادى. ونىڭ ايتۋىنشا، وبلىستاعى جەر قورىنىڭ 32 پايىزى اۋىل شارۋاشىلىعى ماقساتىنداعى جەرلەر. ال جايىلىمدىق جەردىڭ كولەمى 34 ميلليون گەكتاردان استام. ماسەلەن، پروكۋراتۋرا تاراپىنان جۇرگىزىلگەن تەكسەرىس بارىسىندا بايزاق اۋدانىنداعى «تۇرسىنباي» شارۋا قوجالىعى 15 گەكتار جايىلىمدىق جەردى پايدالانىلماي وتىرعانى بەلگىلى بولعان. سول سياقتى جايىلىمدىق جەرگە قاتىستى زاڭ بۇزۋشىلىقتارعا شۋ اۋدانىندا دا جول بەرىلگەن. بۇدان بولەك، وبلىس بويىنشا 673 مىڭ گەكتار جايىلىم 157 لوتيفۋنديستەردىڭ پايدالانۋىندا. بۇل انىقتالعان جەرلەر نەگىزىنەن قورداي، شۋ، مويىنقۇم جانە تالاس اۋداندارىندا ورنالاسقان. ريەۆيزيا بارىسىندا كەيبىر اۋىل اكىمدەرى بىردە- ءبىر مالى جوق ادامدارعا جايىلىمداردى ماقساتسىز ۇلەستىرگەنى انىقتالعان. سونىمەن قاتار، جەر يەسى قايتىس بولىپ كەتكەن ازاماتتاردىڭ جايىلىمدىق جەرلەرى دە قايتا راسىمدەلمەگەن بولىپ شىقتى. بايانداماشى ءسوزىنىڭ سوڭىندا پايدالانىلماي جاتقان اۋىل شارۋاشىلىعى مەن جايىلىمدىق جەرلەردى مەملەكەت قورىنا قايتارۋدى جولعا قويۋ ءۇشىن وبلىس اكىمدىگى جانىنان ارنايى جۇمىس توبىن قۇرۋ ۇسىنىسىن ايتتى.

«بايانداماڭىزدا وبلىستا پايدالانىلماي جاتقان ءۇش مىڭنان استام جايىلىمدىق جەر انىقتالعانىن ايتىپ قالدىڭىز. قازىرگى تاڭدا ونىڭ قانشاسى مەملەكەت قورىنا قايتارىلدى؟ ءبىز ول يگەرۋسىز جاتقان جەرلەردى قايتارىپ قانا قويماي، قايتا اينالىمعا قوسۋىمىز كەرەك، وسىنى ناقتىلاي كەتسەڭىز»، - دەدى وبلىس اكىمى بەردىبەك ساپاربايەۆ.

پروكۋروردىڭ ورىنباسارى نۇربەك ۇلاسبەك ۇلى، بۇگىنگى تاڭدا 263 گەكتاردىڭ قايتارىلعانىن، قالعان جەرلەر بويىنشا زاڭ اياسىندا قايتارۋ شارالارى قولعا الىنعانىن ايتتى.

«ماسەلەن، تالاس اۋدانىندا 2013 -جىلى دۇنيەدەن ءوتىپ كەتكەن تۇرعىننىڭ اتىندا 234 گەكتار جايىلىم جەر تىركەلگەن. ءبىراق ول جەر ءالى كۇنگە دەيىن ەشكىمنىڭ اتىنا راسىمدەلمەگەن. ونى بىرەۋ پايدالانىپ كەلەدى عوي. ول جەر نەگە مەملەكەت قورىنا قايتارىلماعان. سونداي- اق «شاۋشەنوۆا» شارۋا قوجالىعىنىڭ ەنشىسىندە 6600 گەكتار جايىلىمدىق جەر بار، ال قوجالىقتىڭ يەلىگىندە بىردە- ءبىر مال جوق. وسىنداي مىسالدار كوپ. بۇعان كىم جاۋاپ بەرەدى؟» - دەپ وبلىس باسشىسى تالاس، شۋ مەن قورداي اۋداندارىنىڭ بىرنەشە اۋىلدىق وكرۋگ اكىمدەرىنەن ونلاين رەجيمدە مالىمەت سۇرادى.

وكىنىشكە وراي اۋىل اكىمدەرى ءوز وكرۋگىنە جاۋاپتى ەلدى مەكەندەگى شارۋا قوجالىقتاردىڭ مالى بار- جوعىن بىلمەيتىن بولىپ شىقتى. ەشقايسىسى ناقتى جاۋاپ بەرە المادى.

«ءبىز ريەۆيزيانى بەكەردەن بەكەر جۇرگىزىلىپ وتىرعان جوقپىز. بۇل - مەملەكەت باسشىسىنىڭ تاپسىرماسى. ەڭ نەگىزگىسى ءبىز بارلىق جەردى ناقتىلاۋعا ءتيىسپىز. اۋىل مانىنداعى جايىلىمدى كەڭەيتىپ، حالىقتىڭ مال ۇستاۋىنا، مال باسىن كوبەيتۋىنە جاعداي جاساۋعا مىندەتتىمىز. سوندىقتان اۋدان اكىمدەرى مەن اۋىل اكىمدەرى جۇمىس ىستەۋ كەرەك. جۇمىس توبىنىڭ قىزمەتىن جانداندىرىپ، تەز ارادا پايدالانىلماي جاتقان جەرلەردى مەملەكەت قورىنا قايتارۋ قاجەت»، - دەي كەلىپ بەردىبەك ساپاربايەۆ اۋدان اكىمدەرى مەن ءتيىستى باسقارما باسشىلارىنا وبلىستىق جانە اۋداندىق پروكۋراتۋرا وكىلدەرىمەن بىرلەسە جۇمىس ىستەۋدى تاپسىردى.