جاڭا وقۋ جىلىندا ستۋدەنتتەر ستيپەندياسى ارتادى - ءبىلىم ءمينيسترى

نۇر-سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ ستۋدەنتتەر، ماگيسترانتتار جانە دوكتورانتتاردىڭ شاكىرتاقىسى قانشاعا ارتاتىنىن ايتىپ بەردى، دەپ حابارلايدى قازاقپارات ءتىلشىسى.

«Nur Otan» پارتياسىنىڭ سايلاۋالدى باعدارلاماسىنا سايكەس، 2025-جىلعا دەيىن گرانتتار سانى ارتىپ، 75 مىڭ ورىنعا جەتەدى دەپ جوسپارلانعان. قازىردىڭ وزىندە سايلاۋالدى باعدارلامانى ىسكە اسىرۋدى باستادىق. قارجى ءبولىندى. بيىل قىركۇيەك ايىندا گرانتتار سانى 5 مىڭ ورىنعا ۇلعايتىلادى. جىل سايىن باكالاۆرياتقا 51 مىڭ ورىن بولىنسە، بيىل 56 مىڭ ورىن بولادى»، - دەدى مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە، ءبىلىم ءمينيسترى ستيپەنديانى ارتتىرۋ تۋرالى دا تالقىلاۋ بولىپ جاتقانىن ايتتى.

«مەملەكەت باسشىسىنىڭ تاپسىرماسىمەن شاكىرتاقى كولەمى ارتىپ كەلەدى. بيىلعى قىركۇيەك ايىنان باستاپ باكالاۆريات بويىنشا ستيپەنديا مولشەرى 30 مىڭ تەڭگەدەن ءسال اسادى دەپ جوسپارلاپ وتىرمىز. ماگيستراتۋراعا كەلسەك، %15 عا ءوسىپ، شامامەن 76 مىڭ تەڭگە بولماق. دوكتورانتۋرا بويىنشا بيىلعى شاكىرتاقى 172 مىڭ تەڭگە بولادى دەپ جوسپارلاپ وتىرمىز»، - دەپ ءتۇسىندىردى ا. ايماعامبەتوۆ.