بۇگىن ۇلى بريتانيادا «ۇلكەن جەتىلىك» سامميتى باستالادى
اۋقىمدى شارا ماۋسىمنىڭ 13-ىنە دەيىن سوزىلادى. بۇل G 7-گە كىرەتىن ا ق ش، ۇلى بريتانيا، كانادا، گەرمانيا، فرانسيا، يتاليا، جاپونيا ەلدەرى كوشباسشىلارىنىڭ كوروناۆيرۋس ىندەتى باستالعالى العاش رەت جۇزبە- ءجۇز كەزدەسۋى.
سامميتكە بۇدان بولەك اۆستراليا، ءۇندىستان، وڭتۇستىك كورەيا، وڭتۇستىك افريكا جانە ەۋرووداق ەلدەرىنىڭ باسشىلارى قوناق رەتىندە شاقىرىلعان.
سامميتتە ىندەتتەن كەيىن الەم ەكونوميكاسىن قالپىنا كەلتىرۋ مەن وزگە دە حالىقارالىق وزەكتى ماسەلەلەر تالقىلانباق. كەلىسسوزدىڭ كوبى جابىق ەسىك فورماتىندا وتەدى. شارا وتەتىن كورنۋولل گرافتىعىندا قاۋىپسىزدىك كۇشەيتىلگەن. ءبىراق وسىعان قاراماستان جەرگىلىكتى ۇيىم وكىلدەرى نارازىلىق شاراسىن وتكىزدى.
سپيرو ليمنەوس، نارازىلىق شاراسىن ۇيىمداستىرۋشى:
- الەمدە كوروناۆيرۋسقا قارسى ۆاكسيناسىنىڭ تەڭدەي بولىنبەي جاتقانى الاڭداتادى. G 7 ەلدەرى ءوز حالقىن 6-7 ايدىڭ ىشىندە ەگىپ بىتىرەدى، ال دامۋشى ەلدەرگە بۇل ءۇشىن 57 جىل كەرەك ەكەن. سوندىقتان ۇلكەن جەتىلىك باسشىلارىنان ەكپەگە پاتەنتتەن باس تارتۋعا شاقىرامىز.
ايتا كەتەيىك، تاعى ءبىر جايت وسى سامميتتە جۇمىس ىستەيتىن اقپارات قۇرالدارى مەن قاۋىپسىزدىك قىزمەت وكىلدەرى ورنالاسقان قوناق ۇيدە ىندەت تاراپ، كارانتينگە جابىلدى. ءبىراق دەرتتى قانشا ادامنىڭ جۇقتىرعانى بەلگىسىز.