+7 (701) 759 90 19
28 °С : نۇر-سۇلتان
21 °С : الماتى
USD 427.15 EUR 519.12
RUB 5.96 CNY 66.84
جاڭالىقتار

قازاقستان پرەزيدەنتى ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

11 ماۋسىم 13:51
:ءبولىسۋ
قازاقستان پرەزيدەنتى ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

نۇر- سۇلتان. قازاقپارات - اقوردا رەزيدەنسياسىندا ءتورت مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتى قاسىم- جومارت توقايەۆقا سەنىم گراموتالارىن تاپسىرۋ ءراسىمى ءوتتى، دەپ حابارلايدى قازاقپارات اقورداعا سىلتەمە جاساپ.

ءىس- شارا بارىسىندا جاپونيانىڭ ەلشىسى دجۋن يامادا، ءۇندىستاننىڭ ەلشىسى شۋبدارشيني تريپاتي، سونداي- اق، كامبودجانىڭ قازاقستانداعى ەلشىسى مىندەتىن قوسا اتقارۋشى كيم حەنگ ميە جانە شري- لانكانىڭ قازاقستانداعى ەلشىسى مىندەتىن قوسا اتقارۋشى لاماۆانسا ميگاحالاندە دۋراگە سەنىم گراموتالارىن تابىستادى.


مەملەكەت باسشىسى ەلشىلەردى ديپلوماتيالىق ميسسيالارىنىڭ رەسمي باستالۋىمەن قۇتتىقتاپ، ولاردىڭ ەلىمىزدەگى اسا جاۋاپتى قىزمەتتەرى قازاقستان تاۋەلسىزدىگىنىڭ 30 جىلدىعىمەن تۇسپا- تۇس كەلىپ وتىرعانىن اتاپ ءوتتى.

- ءبىزدىڭ ەلىمىز ەگەمەندىگىن العان ۋاقىتتان بەرى كوپقىرلى جانە حالىقارالىق قۇقىققا نەگىزدەلگەن تەڭگەرىمدى سىرتقى ساياساتىن تابىستى جۇرگىزىپ كەلەدى. شىعىس پەن باتىستىڭ ورتاسىندا ستراتەگيالىق اۋماقتا ورنالاسقان قازاقستان ەۋرازياعا قاتىستى ماسەلەلەردە ماڭىزدى ءرول اتقارادى، - دەدى پرەزيدەنت.


قاسىم- جومارت توقايەۆ شەتەلدىك ديپلوماتتارعا قازاقستاننىڭ سىرتقى ساياساتتاعى باسىم باعىتتارى، ەكونوميكالىق جانە ينۆەستيتسيالىق مۇمكىندىكتەرى، وڭىردەگى قاۋىپسىزدىك پەن تۇراقتىلىقتى قامتاماسىز ەتۋدەگى قىزمەتى، سونداي- اق، كوروناۆيرۋس پاندەمياسى مەن كليماتتىڭ وزگەرۋىنە قارسى كۇرەستە قابىلدانىپ جاتقان شارالار جونىندە مالىمەت بەردى.

مەملەكەت باسشىسى ءوز سوزىندە جاپونيا، ءۇندىستان، كامبودجا جانە شري- لانكا ەلدەرىمەن اراداعى ىقپالداستىق باعىتىنداعى ەكونوميكالىق مۇمكىندىكتەردىڭ پەرسپەكتيۆالارىنا ەگجەي- تەگجەيلى توقتالدى. پرەزيدەنت جاپونيا ەلشىسىمەن سويلەسكەندە ونىڭ ەلى قازاقستاننىڭ نەگىزگى ساياسي، ساۋدا جانە ينۆەستيتسيالىق سەرىكتەستەرىنىڭ ءبىرى ەكەنىن اتاپ ءوتتى.


- قازاقستان ەكونوميكاسى جوعارى دەرجاۆا سانالاتىن، سونداي- اق، تەحنولوگيا، «جاسىل» ەكونوميكانى دامىتۋ، ءبىلىم بەرۋ جانە الەۋمەتتىك ادىلدىك سالالارى بويىنشا ۇلگى بولىپ كەلە جاتقان جاپونيامەن اراداعى ىقپالداستىقتى نىعايتۋعا باسا ءمان بەرەدى. بىلتىر پرەمەر- مينيستر يەشيحيدە سۋگامەن تەلەفون ارقىلى سويلەستىك. اڭگىمەمىز جەمىستى بولدى. مەنىڭ شاقىرۋىم بويىنشا ونىڭ قازاقستانعا جاسايتىن ساپارى جان- جاقتى سەرىكتەستىكتىڭ كەلەشەك جول كارتاسىن قابىلداۋعا مۇمكىندىك بەرەدى دەپ ويلايمىز، - دەدى مەملەكەت باسشىسى.

قاسىم- جومارت توقايەۆ ۇندىستانمەن اراداعى ىنتىماقتاستىق تۋرالى ايتا كەلە، ەكى ەلدىڭ ستراتەگيالىق سەرىكتەستىگىنە جوعارى باعا بەردى.


- ءسىزدىڭ ەلىڭىز قارقىندى دامىپ كەلە جاتقان ەكونوميكالىق ورتالىق ءارى ماڭىزدى جاھاندىق مەملەكەت رەتىندە قالىپتاسۋ جولىندا وراسان زور جەتىستىككە جەتتى. پرەمەر- مينيستر موديمەن وتە تابىستى كەلىسسوز جۇرگىزدىك. ەلىڭىزدەگى جانە الەمدەگى جاعدايدىڭ قالىپقا كەلۋىنە قاراي نيۋ- دەليگە ساپارمەن بارۋ مۇمكىندىگىن تاعاتسىزدانا كۇتەمىن، - دەدى قاسىم- جومارت توقايەۆ.

قاسىم- جومارت توقايەۆ كامبودجامەن ءوزارا تىعىز ىقپالداستىقتى دامىتۋ قازاقستاننىڭ وڭتۇستىك شىعىس ازيا ايماعىندا جۇرگىزىپ وتىرعان سىرتقى ساياساتىنىڭ ءبىر بولىگى ەكەنىن ايتتى.


- «ءبىر بەلدەۋ - ءبىر جول» باستاماسىنداعى قازاقستاننىڭ اتقاراتىن ماڭىزدى ءرولى جانە ەۋرازيالىق ەكونوميكالىق وداققا مۇشە بولۋى ا س ە ا ن مەملەكەتتەرىمەن، سونىڭ ىشىندە، كامبودجامەن اراداعى قارىم- قاتىناستى نىعايتۋعا جاڭا مۇمكىندىكتەر بەرەدى. وسى جىلدىڭ سوڭىندا وتەتىن «ازيا - ەۋروپا» فورۋمىنىڭ 13-سامميتىنە تابىس تىلەيمىن، - دەدى پرەزيدەنت.

قاسىم- جومارت توقايەۆ قازاقستان مەن شري- لانكا اراسىنداعى ىنتىماقتاستىق جونىندە ايتا كەلە، تەڭىزدەگى جانە وڭىردەگى تۇراقتىلىقتى ساقتاۋ ءۇشىن ارالداعى مەملەكەتتىڭ ءمانى زور ەكەنىنە نازار اۋداردى.


- ەكى ەل اراسىنداعى ءوزارا تىعىز ىنتىماقتاستىقتى نىعايتۋعا مۇمكىندىك مول، - دەدى مەملەكەت باسشىسى.

سالتاناتتى شارا سوڭىندا پرەزيدەنت ديپلوماتتارعا تابىس تىلەپ، ولاردىڭ مەملەكەتتەرىنىڭ باسشىلارىنا جۇرەكجاردى سالەمىن جولدادى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات