ەلوردا تۇرعىنى ەۆاكۋاتوردىڭ كومەگىمەن اۆتوكولىكتى ۇرلاپ كەتكەن

نۇر- سۇلتان. قازاقپارات - ەلوردا تۇرعىنى «تاپقىرلىق» تانىتىپ، ەۆاكۋاتوردىڭ كومەگىمەن اۆتوكولىكتى ۇرلاپ، ونى قوسالقى بولشەكتەرگە وتكىزىپ جىبەرگەن، دەپ حابارلايدى قازاقپارات قالالىق پ د باسپا ءسوز قىزمەتىنە سىلتەمە جاساپ.

كولىك يەسىنىڭ ايتۋىنشا، ونىڭ «ۆاز 2112» ماركالى اۆتوكولىگى ەكى ايدان استام ۋاقىت بويى سىنىپ تۇرعان. تەرگەۋ بارىسىندا «الماتى» اۋدانى پوليتسيا باسقارماسىنىڭ قىزمەتكەرلەرى ۇرىنىڭ كەشكى ۋاقىتتا ەۆاكۋاتوردىڭ كومەگىمەن كولىكتى الىپ كەتكەنىن انىقتادى. جەدەل- ىزدەستىرۋ ءىس- شارالارىن جۇرگىزۋ كەزىندە كۇدىكتى ۇستالدى.

31 جاستاعى ۇرلىقشى ۇزاق ۋاقىت بويى كۇزەتىلمەگەن تۇراقتاردا تۇرعان ماشينالاردى ادەيى ىزدەيتىن بولعان. ول مۇنداي كولىكتى تۇرعىن ۇيلەردىڭ ءبىرىنىڭ اۋلاسىنان تاپقان. كولىكتىڭ كۇزەت دابىلى بولماعان، ەسىكتەرى قۇلىپتالماعان جانە جاقىن جەردە بەينەباقىلاۋ كامەرالارى دا كورىنبەگەن.

«تاپقىر» قاسكۇنەم ەۆاكۋاتور شاقىرىپ، كولىكتى اۆتوكولىكتەردى بولشەكتەۋمەن اينالىساتىن شەبەرحاناعا اپارعان. سول جەردە ءوزىن كولىك قوجايىنىمىن دەپ تانىستىرىپ، ونى ساتىپ جىبەرگەن. اتالعان فاكتى بويىنشا قىلمىستىق ءىس قوزعالدى.

نۇر- سۇلتان قالاسىنىڭ پوليتسيا دەپارتامەنتى ەلوردا تۇرعىندارى مەن قوناقتارىنا قىراعى بولۋعا، كولىكتى بەينەباقىلاۋ كامەرالارمەن جابدىقتالعان اۆتوتۇراقتارعا قويۋعا، سونداي- اق ەسىكتەرىن دۇرىستاپ قۇلىپتاۋعا كەڭەس بەرەدى. وعان قوسا اۆتوكولىكتەردە قۇندى زاتتاردى قالدىرماۋ كەرەكتىگىن دە ەسكەرتەدى.