پاريج ءسان پوديۋمىن باعىندىرعان تۇڭعىش قازاق قىزى
بەرلين يريشيەۆتىڭ بۇل كىتابى اتى اڭىزعا اينالعان قازاق قىزى پاريجدىك مودەل اللا يلچۋنعا ارنالعان. ول ⅩⅩ عاسىردىڭ ورتاسىندا ءسان الەمىندە توپ جارىپ، ۇلى كۋتيۋرە كريستيان ديورعا ۇمىتىلماس اسەر قالدىرعان.
«پاريجدىڭ ءسانى مەن اسەمدىگى» اتتى ءىس- شاراعا ءال- فارابي اتىنداعى قازۇۋ باسقارما ءتوراعاسى- رەكتورى جانسەيىت تۇيمەبايەۆ، فرانسيانىڭ قازاقستانداعى توتەنشە جانە وكىلەتتى ەلشىسى ديدە كانەسس، بەلگىلى قوعام قايراتكەرلەرى، مادەنيەتتانۋشىلار، وقىتۋشىلار مەن ستۋدەنتتەر قاتىستى. كەشتى ەلىمىزدىڭ قوعام قايراتكەرى، بەلگىلى ساياساتتانۋشى دوسىم ساتپايەۆ جۇرگىزدى.
ءىس- شارا قاتىسۋشىلارىنا ءال- فارابي اتىنداعى قازۇۋ باسقارما ءتوراعاسى- رەكتورى جانسەيىت تۇيمەبايەۆ قۇتتىقتاۋ ءسوز سويلەدى. وقۋ ورنىندا العاش رەت ءسان تاريحىنا ارنالعان كىتاپتىڭ تۇساۋكەسەرى ءوتىپ جاتقانىن ايتا كەلە، ول بۇل وقيعانىڭ كەزدەيسوق ەمەس ەكەنىن اتاپ ءوتتى، ويتكەنى ءبىز ⅩⅩ عاسىردىڭ تاريحى مەن مادەنيەتىنىڭ قيىن كەزەڭدەرىنە توقتالامىز. ءال- فارابي اتىنداعى قازۇۋ. ەلىمىزدىڭ ادامي كاپيتالىن دامىتۋدىڭ جەتەكشى ورتالىعى بولىپ تابىلادى. ءبىزدىڭ مىندەتىمىز- جاستاردى ساپالى بىلىممەن قامتاماسىز ەتۋ عانا ەمەس، سونىمەن قاتار ەستەتيكالىق تالعامدى قالىپتاستىرۋ، مۋزىكالىق تالانتتاردى دامىتۋ، ونەردى تۇسىنۋگە ۇيرەتۋ»، - دەدى ج و و باسشىسى ءوز سوزىندە.
ۋنيۆەرسيتەت باسشىسى اۆتور ۇسىنعان كىتاپ ءبىر كەيىپكەردىڭ تاعدىرىن عانا ەمەس، سونىمەن قاتار ⅩⅩ عاسىردىڭ تاريحي وقيعالارىنداعى ايەلدەردىڭ ءرولى مەن ۇلەسىن دە قامتيتىنىن اتاپ ءوتتى. جوعارى ءسان الەمى تۋرالى كىتاپتىڭ تۇساۋكەسەرى ءۇشىن بەرلين يريشيەۆقا العىس بىلدىرە وتىرىپ، ۋنيۆەرسيتەت باسشىسى اۆتوردىڭ ەلىمىزدىڭ قوعامدىق- ساياسي ومىرىنە قوسقان ۇلەسى تۋرالى ايتىپ، ونىڭ ءپاتريوتيزمى مەن وتانىنا دەگەن ۇلكەن سۇيىسپەنشىلىگىن اتاپ ءوتتى. كەزدەسۋ بارىسىندا بەرلين كەنجەتاي ۇلى «ەرەن ەڭبەگى ءۇشىن» مەدالىمەن ماراپاتتالىپ، عىلىم مەن جوعارى ءبىلىمدى دامىتۋعا قوسقان ۇلەسى ءۇشىن ءال- فارابي اتىنداعى قازاق ۇلتتىق ۋنيۆەرسيتەتىنىڭ قۇرمەتتى پروفەسسورى اتاعى بەرىلدى.
ءىس- شارانى ۇيىمداستىرۋشىلارعا العىس بىلدىرە وتىرىپ بەرلين يريشيەۆ: الەمدەگى ءسان پاديشالارى تۋرالى كوپتەگەن اڭىزدار بار ەكەندىگىن، الايدا ادامدار تەك فاكتىلەرگە سەنەتىندىگىن، سول سەبەپتەن بۇل كىتاپتى جازۋ بارىسىندا تەك تاريحي دەرەكتەرگە نازار اۋدارعاندىعىن اشىپ ايتتى. اللا ءيلچۋننىڭ ءومىرى تۋرالى شىنايى اقپارات جيناۋ وڭاي بولعان جوق. الايدا، شىعارماشىلىق توپ اتى اڭىزعا اينالعان پاريج سانبيكەسى اللا يلچۋن تۋرالى تاريحي مالىمەتتەردى تابۋ ءۇشىن كوپ جۇمىس جاساعاندىعىن باياندادى.
كىتاپتا العاش رەت سانبيكەسىنىڭ جەكە باسىن اشاتىن، ونىڭ ءومىرى مەن مانسابى تۋرالى باياندايتىن مۇراعاتتىق قۇجاتتار، وتباسىلىق مۇراعاتتاردان سيرەك كەزدەسەتىن فوتوسۋرەتتەر، ونىڭ جالعىز ۇلىنىڭ ەستەلىكتەرى، ءسان تاريحشىلارىنىڭ تۇسىنىكتەمەلەرى، سونداي - اق حالىقارالىق ونەرتانۋشىلاردىڭ ساراپتامالىق قورىتىندىلارى جانە ونىڭ اكەسى قۋانتقان ەلشىننىڭ قازاق ەكەندىگى تۋرالى كۋالىكتەر جيناقتالعان.
ءىس- شارا سوڭىندا كەشتىڭ قاتىسۋشىلارى مەن قوناقتارى اۆتوردىڭ قولتاڭباسى بار كىتاپتاردى سىيعا الدى.
قايرات ب. ق. ءال- فارابي اتىنداعى قازاق ۇلتتىق ۋنيۆەرسيتەتى
بيوفيزيكا، بيومەديتسينا جانە نەيروعىلىم كافەدراسىنىڭ وقىتۋشىسى
massaget.kz