اقتوبەدە شەكارانى زاڭسىز كەسىپ وتكەن رەسەيلىك ۇستالدى

اقتوبە. قازاقپارات - اقتوبەدە مەملەكەتتىك شەكارانى زاڭسىز كەسىپ وتكەن رەسەيلىك ازامات ۇستالدى، دەپ حابارلايدى قازاقپارات ءتىلشىسى.

ءۇش كۇندە كوشى- قون زاڭناماسىن بۇزعان 167 ادام اكىمشىلىك جاۋاپقا تارتىلدى. ونىڭ ىشىندە 95 شەتەلدىك جانە 72 قازاقستان ازاماتى بار. سونىمەن بىرگە 14 شەتەلدىك ەلدەن شىعارىلدى.

رەسەي ازاماتى قازاقستان شەكاراسىن قاساقانا زاڭسىز كەسىپ وتكەن. بۇل قارعالى اۋدانىندا پاسپورت رەجيمىن تەكسەرۋ كەزىندە انىقتالدى. 46 جاستاعى ەر ادام ۇستالدى. ياعني، مەملەكەتتىك شەكارا بەكەتىنەن ەمەس، وزگە جولمەن قازاقستان اۋماعىنا كىرگەن.

«قىلمىستىق كودەكستىڭ «قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ« بابى بويىنشا تەرگەۋ امالدارى جۇرگىزىلىپ جاتىر»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.