پرەزيدەنت قورعاستا كونتەينەرلىك تاسىمالعا ارنالعان ترەكينگ جاساۋدى تاپسىردى

نۇر-سۇلتان. قازاقپارات - پرەزيدەنت قاسىم-جومارت توقايەۆ قورعاس بەكەتىندە كونتەينەرلەردىڭ تولاسسىز قوزعالىسىن قامتاماسىز ەتەتىن ترەكينگ ورناتۋدى تاپسىردى، دەپ حابارلايدى قازاقپارات ءتىلشىسى.

«مەن ۇكىمەتكە شەكارادا - اتاپ ايتقاندا، قورعاستا ناقتى ورنالاسقان جەرى، جول ءجۇرۋ ۋاقىتى، كىدىرىستەر كورسەتىلەتىن كونتەينەرلەر ترەكينگىن ەنگىزۋدى تاپسىرامىن»، - دەدى قاسىم-جومارت توقايەۆ شەتەلدىك ينۆەستورلار كەڭەسىنىڭ وتىرىسىندا.

ونىڭ ايتۋىنشا، اقپاراتتىق جۇيە وزبەكستانمەن، قىرعىزستانمەن جانە باسقا دا كورشىلەرمەن قۇرىلاتىن بارلىق ەركىن ساۋدا ورتالىقتارىندا جۇمىس ىستەۋى ءتيىس.

«قازىر كولىك كوممۋنيكاتسيالارى ۇكىمەت ساياساتىنداعى باسىمدىق بولىپ تابىلادى. وسى باعدارلامانىڭ ىسكە اسىرىلۋىن ءوزىم تىكەلەي باقىلايمىن»، - دەدى مەملەكەت باسشىسى.

سونداي-اق، پرەزيدەنت سوڭعى 10 جىلدا قازاقستان جاھاندىق كولىك دالىزدەرىندە قۋاتتى ينفراقۇرىلىمدىق شەڭبەر قۇرعانىن ەسكە سالدى.

«2020-جىلى ترانزيتتىك تەمىرجول تاسىمالىنىڭ كولەمى 17 پايىزعا ءوستى. ءوسىمنىڭ باستى فاكتورى كونتەينەرلىك تاسىمال بولدى. قازاقستاننىڭ تەمىرجول تاسىمالىنداعى الەۋەتىن بارىنشا پايدالانۋدىڭ جاڭا مىندەتتەرى پايدا بولىپ وتىر. بىلتىر 900 مىڭعا جۋىق كونتەينەر تاسىمالداندى. بۇل 2019-جىلعى كورسەتكىشتەن 32 پايىزعا جوعارى. ونىڭ 91 پايىزى قىتاي-ەۋروپا، ەۋروپا-قىتاي باعىتىنا تيەسىلى. تەمىرجول، اۆتوموبيل تاسىمالى مەن قۇبىر ارقىلى تاسىمال بويىنشا كورسەتىلگەن قىزمەتتەردىڭ ۇلەسى ترانسپورتتىق قىزمەتتەردىڭ 67 پايىزىن قۇرادى. قازاقستان ازيا مەن ەۋروپا اراسىنداعى قۇرلىقتىق تاسىمالدىڭ ماڭىزدى بۋىنىنا اينالدى دەپ سەنىممەن ايتۋعا بولادى. قازاقستان قىتايدىڭ «ءبىر جول - ءبىر بەلدەۋ» جاھاندىق جوباسىن ىسكە اسىرۋداعى ماڭىزدى ءارى جەتەكشى سەرىكتەسى»، - دەدى قاسىم-جومارت توقايەۆ.