+7 (701) 759 90 19
22 °С : نۇر-سۇلتان
27 °С : الماتى
USD 424.99 EUR 504.21
RUB 5.81 CNY 65.66
جاڭالىقتار

قازاقستاندىق جۇپ تۇڭعىش رەت رولان گارروس تۋرنيرىنىڭ فينالىنا شىقتى

10 ماۋسىم 20:30
:ءبولىسۋ
قازاقستاندىق جۇپ تۇڭعىش رەت رولان گارروس تۋرنيرىنىڭ فينالىنا شىقتى

نۇر-سۇلتان. قازاقپارات - قازاقستاندىقتار الەكساندر بۋبليك پەن اندرەي گولۋبيەۆ جۇپتىق سىندا رولان گارروس تۋرنيرىنىڭ فينالىنا شىقتى، دەپ حابارلايدى قازاقپارات ءتىلشىسى.

قازاقستاندىق جۇپ جارتىلاي فينالدا يسپانيالىقتار پابلو اندۋحار - پەدرو مارتينەسپەن كۇش سىناستى.

سپورتتىق جولدارىندا 33 جاستاعى ا. گولۋبيەۆ پەن ودان ون جاس كىشى ا. بۋبليك بۇعان دەيىن «ۇلكەن دۋلىعا» تۋرنيرلەرىندە جۇپتىق سىندا وسىمەن ەكىنشى رەت جارتىلاي فينالدا باق سىنادى.

جەتى جىل بۇرىن ا. گولۋبيەۆ اۋستراليالىق سەم گروتپەن بىرگە رولان گارروس تۋرنيرىنىڭ جارتىلاي فينالىنا دەيىن جەتىپ، بولاشاق جەڭىمپازدار جيۋلەن بەننەتو مەن ەدۋارد روجە- ۆاسسلەنگە 6:3، 3:6، 4:6 ەسەبىمەن ەسە جىبەردى.

ا. بۋبليك تاعى ءبىر قازاقستاندىق ميحايل كۋكۋشكينمەن بىرگە 2020-جىلعى اۋستراليا اشىق چەمپيوناتىنىڭ جارتىلاي فينالىندا بولاشاق چەمپيوندار، امەريكالىق رادجيۆ رام مەن ۇلى بريتانيالىق دجو سولسبەريدەن 6:4، 3:6، 4:6 ەسەبىمەن ۇتىلىپ قالعان ەدى.

بۇل جولى يسپانيالىق جۇپ ماتچتى قارقىندى باستاپ، ءبىرىنشى پارتيادا بەت قاراتقان جوق - 6:1. ەكىنشى سەتتە ەسەپ 4:4 بولعان مەزەتتە قازاقستاندىقتار برەيك جاساي ءبىلدى. سوسىن ا. بۋبليك دوپتى وتە ءساتتى بەردى - 6:4.

ءۇشىنشى، شەشۋشى پارتيادا ەسەپ 3:3 بولعاندا، قازاقستاندىق جۇپ برەيك جاسادى. اقىرى ا. گولۋبيەۆ ماتچقا دوپ بەرگەندە، قازاقستاندىقتار جەڭىستى جۇلىپ الدى - 6:4.

تارتىستى باسەكە 1 ساعات 44 مينۋتقا سوزىلدى. قازاقستاندىقتار فينالدا فرانسيا اشىق چەمپيوناتىنىڭ 2-راكەتكالارى، كولۋمبيالىقتار حۋان-سەباستيان كابال - روبەرت فاراح نەمەسە كورت يەلەرى پەر- يۋگ ەربەر - نيكوليا مايۋ جۇپتارىنىڭ قاي جەڭگەنىمەن باس جۇلدەنى ساراپقا سالادى.

ەسكە سالا كەتەيىك، بۇدان بۇرىن تيموفەي سكاتوۆتىڭ الماتى تۋرنيرىنىڭ شيرەك فينالىنا شىققانىن، ەلەنا رىباكينانىڭ جۇپتىق سىندا رولان گارروس جارىسىنىڭ جارتىلاي فينالىنا وتە الماعانىن جازعان بولاتىنبىز.

سونداي-اق قازاقستاندىق تەننيسشى سلوۆاكياداعى تۋرنيردىڭ شيرەك فينالىنا شىقتى. دميتري پوپكو الماتى تۋرنيرىنىڭ شيرەك فينالىنا ءوتتى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات