قاسىم-جومارت توقايەۆ قاتار سىرتقى ىستەر ءمينيسترىن قابىلادى

None
None
نۇر-سۇلتان. قازاقپارات - قاسىم-جومارت توقايەۆ قازاقستانعا رەسمي ساپارمەن كەلگەن قاتار مەملەكەتى پرەمەر-ءمينيسترىنىڭ ورىنباسارى - سىرتقى ىستەر ءمينيسترى شەيح مۇحاممەد بەن ابدۋلراحمان ءال ءتانيدى قابىلدادى.

بۇل تۋرالى قازاقپارات اقوردانىڭ رەسمي سايتىنا سىلتەمە جاساپ حابارلايدى.

كەزدەسۋ بارىسىندا قازاق-قاتار قاتىناستارىنىڭ دامۋ پەرسپەكتيۆالارى تالقىلاندى.

بۇل رەتتە ساياسي، ساۋدا-ەكونوميكالىق جانە ينۆەستيتسيالىق بايلانىستاردى نىعايتۋعا باسا ءمان بەرىلدى. قازاقستان پرەزيدەنتى ءوزارا قىزىعۋشىلىق تانىتاتىن سالالار بويىنشا ەكى ەل اراسىنداعى قارىم-قاتىناستاردى نىعايتۋ ءۇشىن زور مۇمكىندىك بار ەكەنىن ايتتى.

- ءسىزدىڭ بۇل ساپارىڭىزدىڭ ماڭىزى وتە زور بولادى دەپ ويلايمىن. كەلەشەكتە ءبىز ءوزارا ىنتىماقتاستىق باعىتىندا ۇلكەن ناتيجەلەرگە قول جەتكىزە الاتىنىمىزعا سەنىمدىمىن. قازاقستان وسىنداي جەتىستىكتەرگە قول جەتكىزۋگە مۇددەلى، - دەدى مەملەكەت باسشىسى.

پرەزيدەنت قاسىم-جومارت توقايەۆ قاتار ءامىرى شەيح تاميم بەن حاماد ءال تانيمەن جۋىردا تەلەفون ارقىلى سويلەسكەن كەزدە قول جەتكىزىلگەن ۋاعدالاستىق تۋرالى ايتتى.

اتاپ ايتقاندا تاراپتار قاتار باسشىسىنىڭ قازاقستانعا جوسپارلانعان ساپارىنىڭ قارساڭىندا بىرنەشە ءىرى ينۆەستيتسيالىق جوبالاردى بىرلەسە ازىرلەۋ جونىندە كەلىسىمگە كەلگەن. ءوز كەزەگىندە، قاتار پرەمەر-ءمينيسترىنىڭ ورىنباسارى - سىرتقى ىستەر ءمينيسترى قاتار ءامىرىنىڭ قازاقستان پرەزيدەنتىنە جانە حالقىنا جولداعان سالەمى مەن ىزگى تىلەگىن جەتكىزدى. شەيح مۇحاممەد بەن ابدۋلراحمان ءال تاني قاسىم- جومارت توقايەۆقا قاتار ءامىرىنىڭ ەكونوميكا سالاسىنا باسا ءمان بەرە وتىرىپ، قازاقستانمەن اراداعى ىقپالداستىقتى ودان ءارى نىعايتۋ ءۇشىن بەرىك نەگىز قالاۋعا مۇددەلى ەكەنىن ءبىلدىردى.

سونداي-اق كوروناۆيرۋس ىندەتىنە قارسى قازاقستاندىق QazVac ۆاكسيناسىنىڭ ازىرلەنۋىنە بايلانىستى قاتار باسشىسىنىڭ قۇتتىقتاۋىن جەتكىزىپ، اتالعان ماسەلە بويىنشا كەز كەلگەن كومەك كورسەتۋگە دايىن ەكەنىن اتاپ ءوتتى.

بۇدان بولەك قاتاردىڭ سىرتقى ساياسي ۆەدومستۆوسىنىڭ باسشىسى قازاقستان پرەزيدەنتى قاسىم-جومارت توقايەۆقا سىرتقى ىستەر ءمينيسترى مۇحتار تىلەۋبەردىمەن وتكىزگەن كەلىسسوز ناتيجەلەرى جونىندە، سونداي-اق، قازاقستان تاراپىنان ينۆەستيتسيالىق جوبالاردى ىسكە اسىرۋعا بايلانىستى ءبىرقاتار ۇسىنىس تۇسكەنى تۋرالى مالىمەت بەردى.

بۇل رەتتە قاتاردىڭ ۇلتتىق ءال-اۋقات قورى مەن ۇلتتىق كومپانيالارى اتالعان جوبالاردى زەرتتەۋ بويىنشا بەلسەندى جۇمىس جۇرگىزىپ وتىرعانىن اتاپ ءوتتى.

سوڭعى جاڭالىقتار