قۇرىلىس ماتەريالدارىنىڭ نەگىزسىز قىمباتتاۋىنا جول بەرمەۋ كەرەك - اسقار مامين

نۇر- سۇلتان. قازاقپارات - ق ر پرەمەر- ءمينيسترى اسقار مامين قۇرىلىس ماتەريالدارى باعاسىنىڭ نەگىزسىز ءوسۋىن بولدىرماۋ بويىنشا شارا قابىلداۋدى تاپسىردى، دەپ حابارلايدى قازاقپارات.

«قۇرىلىستىڭ جوعارى قارقىنى - قۇرىلىس ماتەريالدارىنا قاجەتتىلىكتى ارتتىرادى، ولارعا جۇمسالاتىن شىعىننىڭ ۇلەسى تۇتاس قۇرىلىستاعى شىعىننىڭ شامامەن 50 پايىزىن قۇرايدى. وسىعان وراي باعانىڭ نەگىزسىز وسۋىنە جول بەرمەۋ جانە نارىقتا قاتاڭ باقىلاۋدى قامتاماسىز ەتۋ بويىنشا شۇعىل شارالار قابىلداۋ وتە ماڭىزدى. سوندىقتان بۇگىن ۇسىنىلعان شارالاردى جالپى قولداي وتىرىپ، مىنا ماسەلەلەرگە توقتالعىم كەلەدى»، - دەدى ا. مامين بۇگىنگى ۇكىمەت وتىرىسىندا.

ەڭ الدىمەن پرەمەر- مينيستر قۇرىلىس كومپانيالارى مەن وتاندىق قۇرىلىس ماتەريالدارىن وندىرۋشىلەر تاراپىنان سپەكۋلياتيۆتىك ارەكەتتەرگە جول بەرمەۋ قاجەتتىگىن ايتتى.

«باسەكەلەستىكتى قورعاۋ اگەنتتىگى يندۋستريا مينيسترلىگىمەن جانە اكىمدىكتەرمەن بىرلەسىپ، جوسىقسىز وندىرۋشىلەر مەن ءونىم بەرۋشىلەرگە قاتىستى قاتاڭ شارالار قابىلداۋى قاجەت. ەكىنشىدەن، وفتەيك- كەلىسىمشارتتار دا باعانىڭ تۇراقتىلىعىن قامتاماسىز ەتۋدىڭ ءتيىمدى قۇرالى بولا الادى. قازىرگى ۋاقىتتا ۇكىمەت قۇرىلىس سالۋشىلارمەن كەيىننەن تۇرعىن ءۇيدى بەلگىلەنگەن باعامەن ساتىپ الۋعا وففتەيك- كەلىسىمشارتتار تەتىگىن ەنگىزىپ جاتىر. يندۋستريا مينيسترلىگىنە ۇلتتىق كاسىپكەرلەر پالاتاسىمەن بىرلەسىپ، قۇرىلىس سالۋشىلار مەن قۇرىلىس ماتەريالدارىن وندىرۋشىلەر اراسىندا ۇزاق مەرزىمدى ساتىپ الۋ كەلىسىمشارتتارىن جاساۋدى پىسىقتاۋدى تاپسىرامىن»، - دەدى ۇكىمەت باسشىسى.

سونىمەن بىرگە، ا. مامين وتاندىق قۇرىلىس ماتەريالدارىن ودان ءارى دامىتۋ نارىقتى قولجەتىمدى ماتەريالدارمەن تولىقتىرۋدىڭ ماڭىزدى اسپەكتىسى ەكەنىن ەسكە سالدى.

«جاڭا وندىرىستەر قۇرۋ، ەسكىلەرىن جاڭعىرتۋ قۇرىلىس شىعىندارىن ايتارلىقتاي ازايتۋعا مۇمكىندىك بەرەدى. يندۋستريا مينيسترلىگىنە اكىمدىكتەرمەن جانە «اتامەكەن» كاسىپكەرلەر پالاتاسىمەن بىرلەسىپ، قۇرىلىس سالاسىندا يمپورت الماستىرۋ بويىنشا جوسپارلانعان جوبالاردى ۋاقىتىندا ىسكە قوسۋدى تاپسىرامىن. رومان ۆاسيليەۆيچ (ق ر پرەمەر- ءمينيسترىنىڭ ورىنباسارى رومان سكليار - رەد.) جالپى باقىلاۋ سىزگە جۇكتەلەدى»، - دەدى اسقار مامين.

ەسكە سالا كەتسەك، قاڭتار- ءساۋىر ايلارىندا وتاندىق قۇرىلىس ماتەريالدارى % 16- عا قىمباتتاعان. ق ر باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين قۇرىلىس ماتەريالدارىنىڭ الىپساتارلىقتان قىمباتتاعانىن ايتتى.

اۆتور: ايجان سەرىكجان قىزى