اسقار مامين ق ر پرەزيدەنتىنە الەۋمەتتىك- ەكونوميكالىق دامۋ قورىتىندىلارىن باياندادى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ پرەمەر- مينيستر اسقار ماميندى قابىلدادى، دەپ حابارلايدى قازاقپارات اقورداعا سىلتەمە جاساپ.

قاسىم- جومارت توقايەۆقا قازاقستاننىڭ بيىلعى قاڭتار- مامىر ايلارىنداعى الەۋمەتتىك- ەكونوميكالىق دامۋىنىڭ قورىتىندىلارى، ەلىمىزدەگى سانيتارلىق- ەپيدەميولوگيالىق احۋال مەن ەگىس ناۋقانىنىڭ اياقتالعانى جونىندە ەسەپ بەرىلدى.

پرەمەر- مينيستر قازاقستان ەكونوميكاسىنىڭ پاندەميادان كەيىنگى قايتا قالپىنا كەلۋ ساتىسىنا وتكەنى تۋرالى ايتتى. بيىلعى قاڭتار- مامىر ايلارىنداعى ىشكى جالپى ءونىم ءوسىمىنىڭ قارقىنى بىلتىرعى وسى كەزەڭمەن سالىستىرعاندا 1,6 پايىزدى قۇرادى. اسقار ءماميننىڭ ايتۋىنشا، دامۋدىڭ نەگىزگى قوزعاۋشى كۇشى 7,2 پايىزدىق ءوسىم دەڭگەيىن كورسەتىپ وتىرعان وڭدەۋ ونەركاسىبى (ماشينا جاساۋ، قۇرىلىس ماتەريالدارىن ءوندىرۋ، جەڭىل ونەركاسىپ جانە ت. ب. سالالاردا قارقىندى ءوسىم بار)، قۇرىلىس سەكتورى بولىپ وتىر.

ەكونوميكانىڭ وندىرمەيتىن سەكتورلارىندا جوعارى ينۆەستيتسيالىق بەلسەندىلىك بايقالادى. نەگىزگى كاپيتالعا قۇيىلعان ينۆەستيتسيانىڭ ءوسىمى تاۋ- كەن سالاسىن ەسەپكە الماعاندا 25,5 پايىزعا جەتكەن. پرەزيدەنتكە كوكتەمگى ەگىن ەگۋ جۇمىستارىنىڭ ناتيجەسىندە ەگىس القاپتارى 78,2 مىڭ گەكتارعا ۇلعايىپ، 22,7 ميلليون گەكتارعا دەيىن ارتقانى جونىندە باياندالدى.

ۇكىمەت كوكتەمگى ەگىس ناۋقانىن قارجىلىق، ماتەريالدىق- تەحنيكالىق تۇرعىدان قامتاماسىز ەتۋ ءۇشىن بارلىق قاجەتتى شەشىمدەردى قابىلدادى. كوكتەمگى ەگىس جۇمىستارىنا 128 ميلليارد تەڭگە قارجى ءبولىنىپ، 380 مىڭ توننا جانارماي نارىقتاعى باعادان 14 پايىزعا تومەن ساتىلعان جانە 405,3 مىڭ توننا تىڭايتقىش بەرىلگەن.

پرەمەر- مينيستر ەلىمىزدەگى سانيتارلىق- ەپيدەميولوگيالىق احۋالدىڭ جاقسارعانىن ايتىپ، Covid-19 ىندەتىنىڭ تارالۋى بويىنشا قازاقستان «سارى» ايماقتان «جاسىل» ايماققا وتكەنىن جەتكىزدى. ءبىر اپتا ىشىندە ىندەت جۇقتىرۋ دەڭگەيى 30 پايىزعا ازايىپ، كوروناۆيرۋستىڭ تارالۋ يندەكسى 0,84-كە دەيىن تومەندەگەن. جۇقپالى اۋرۋلار بولىمدەرىنىڭ 24 پايىزىندا، جان ساقتاۋ بولىمدەرىنىڭ 21 پايىزىندا ناۋقاستار ەم قابىلداپ جاتىر.

نۇر- سۇلتان قالاسى «قىزىل» ايماقتا، الماتى قالاسى، اتىراۋ، پاۆلودار، باتىس قازاقستان، اقمولا جانە قاراعاندى وبلىستارى «سارى» ايماقتا. قالعان 10 وبلىس - «جاسىل» ايماقتا. قازىرگى تاڭدا 2,4 ميلليون ادام ەكپەنىڭ ءبىرىنشى كومپونەنتىن الدى، 1,3 ميلليونعا جۋىق ادامعا ەكپەنىڭ ەكىنشى كومپونەنتى سالىنعان.

مەملەكەت باسشىسى تۇرعىندارعا ۆاكسينا سالۋ قارقىنىن باسەڭدەتپەۋدىڭ جانە ەپيدەمياعا قارسى شارالاردى جالعاستىرۋدىڭ ماڭىزدى ەكەنىن اتاپ ءوتتى. كەزدەسۋ قورىتىندىسى بويىنشا پرەزيدەنت الەۋمەتتىك ماڭىزى بار ازىق- تۇلىك تاۋارلارىنىڭ باعاسىن ۇستاپ تۇرۋ، قۇرىلىس ماتەريالدارىنىڭ باعاسىن رەتتەۋ، سىرتقى جانە ىشكى ينۆەستيتسيا كولەمىن ارتتىرۋ، وڭدەۋ سەكتورىن دامىتىپ، ءوسىمىن قامتاماسىز ەتۋ ارقىلى ەكونوميكانىڭ قۇرىلىمدارىن ءارتاراپتاندىرۋ جونىندەگى شارالاردى جۇزەگە اسىرۋعا باسا ءمان بەرۋدى تاپسىردى.