جاقسىلىق ۇشكەمپىروۆتىڭ ءومىر جولى تۋرالى كىتاپ جارىق كوردى
كىتاپ اۆتورى جازۋشى، قازاقستاننىڭ ەڭبەك سىڭىرگەن قايراتكەرى، «الاش» ادەبي سىيلىعىنىڭ يەگەرى ساۋلە دوسجانوۆا. ول بۇل روماندا جاقسىلىق ۇشكەمپىروۆتىڭ بالالىق شاعىنان اتى اڭىزعا اينالعان داڭقتى كەزەڭىنە دەيىنگى عيبراتتى عۇمىرىن ارقاۋ ەتكەن. كىتاپ الماتى وبلىسى اكىمدىگىنىڭ قولداۋىمەن جارىق كوردى.
تالدىقورعانداعى سالتانات سارايىندا وتكەن كىتاپتىڭ تۇساۋكەسەرىنە وبلىس اكىمى اماندىق باتالوۆ، قوعام جانە مەملەكەت قايراتكەرى، گەنەرال- پولكوۆنيك سات توقپاقبايەۆ، كىتاپ اۆتورى، جازۋشى ساۋلە دوسجانوۆا، قازاقستان جازۋشىلار وداعى باسقارما ءتوراعاسىنىڭ ورىنباسارى باۋىرجان جاقىپ، جاقسىلىق ۇشكەمپىروۆتىڭ جارى كۇلپان مۇقاش قىزى مەن ۇلدارى ەلدوس پەن جەڭىس، ءبىرقاتار تانىمال جاتتىقتىرۋشىلار مەن بەلگىلى سپورتشىلار جانە وڭىردەگى زيالى قاۋىم وكىلدەرى قاتىستى.
«جاقسىلىق ۇشكەمپىروۆ بارشا قازاقتىڭ جاقسىلىعى ەدى، بولمىسى تازا، بىلەكتى دە، جۇرەكتى، باۋىرماشىل، قاراپايىم جان ەدى. جاقسىلىق اعامىزبەن مەن كوپ جىل جاقىن ارالاسىپ، دوس بولدىم. وليمپياداداعى جەڭىستى جولى، ەلباسىنىڭ قولىنان قازاقستاننىڭ ەڭبەك ەرى اتاعىن الۋى، اۋىل شارۋاشىلىعىندا جەمىستى جۇمىس ىستەپ، ءوڭىر حالقىنا مەيىرىم- شاپاعاتىن تيگىزگەنى - وسىنىڭ ءبارىن ءبىز جاستارعا ۇلگى ەتۋىمىز كەرەك. جازۋشى ساۋلە دوسجاننىڭ جاقسىلىق اعامىز تۋرالى جازعان كىتابىنا قولداۋ جاساپ، بۇگىن تۇساۋكەسەرىن وتكىزىپ وتىرمىز. جاقسىلىق ۇشكەمپىروۆتىڭ سپورتتاعى جولىن جالعايتىن ورەندەردى تاربيەلەۋگە دە بار جاعداي جاساپ كەلەمىز. ەلباسىنىڭ تاپسىرماسىمەن وبلىستا 16 سپورت كەشەنىن سالدىق»، - دەپ اتاپ ءوتتى ا. باتالوۆ.
سول سياقتى وبلىس اكىمى تانىمال سپورتشىنىڭ ەسىمىن وبلىستىق بالالار مەن جاسوسپىرىمدەر مەكتەپ- ينتەرنات كوللەدجىنە بەرۋ جۇمىسى جۇرگىزىلىپ جاتقانىن اتاپ ءوتتى.