مايك تايسوننىڭ كەلەسى جەكپە- جەگى قاشان وتەتىنى بەلگىلى بولدى

نۇر- سۇلتان. قازاقپارات - سۋپەراۋىر سالماقتا بۇرىنعى ابسوليۋتتى الەم چەمپيونى مايك تايسون رينگكە بيىلعى جىلدىڭ كۇزىندە ورالماق.

بۇل تۋرالى بوكسشىنىڭ جاتتىقتىرۋشىسى رافاەل كوردەيرو ءمالىم ەتتى، دەپ حابارلايدى قازاقپارات Sports.kz سايتىنا سىلتەمە جاساپ.

ەسكە سالا كەتسەك، وتكەن جىلدىڭ سوڭىندا «تەمىر مايكل» رينگتىڭ تاعى ءبىر اڭىزعا اينالعان تۇلعاسى - كىشى روي دجونسقا قارسى كورمە جەكپە- جەگىن وتكىزگەن. جاستارى ۇلعايعان ەكى بوكسشى بارلىق ديستانتسيادان ءوتىپ، جۇدىرىقتاسۋدى تەڭ ەسەپپەن اياقتادى.

«ءبىز جاتتىعۋىمىزدى جالعاستىرىپ جاتىرمىز. ول - جاتتىعۋىن ۇزبەيتىن مىقتى سپورتشى. قىركۇيەكتە كەزدەسۋ وتەدى دەپ ويلايمىن. كەلەسى قارسىلاستىڭ كىم بولاتىنىن بىلمەيمىن. ونىڭ Legends Only League كومپانياسى وسى جاعىنان جۇمىس جۇرگىزۋدە، تەلەديدارمەن كەلىسسوزدەر وتكىزىپ، كەستەنى ويلاستىرىپ جاتىر. ءبىز بولساق، جاتتىعىپ جاتىرمىز. قىركۇيەك ايىندا جۇدىرىقتاسۋعا شىعامىز»، - دەدى كوردەيرو.

اۆتور: زارينا تۋعانبايەۆا