باتىس قازاقستاندا ازامات سوعىسى كەزىنەن قالعان التى سنارياد تابىلدى

ورال. قازاقپارات - باتىس قازاقستان وبلىسىندا ازامات سوعىسى كەزىنەن قالعان التى سنارياد تابىلدى، دەپ حابارلايدى قازاقپارات ءتىلشىسى.

پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆ ءمالىم ەتكەنىندەي، وقيعا 8- ماۋسىم كۇنى اقجايىق اۋدانى بۋدارين اۋىلىندا بولدى.

ساعات 11.45 تە 1963-جىلعى اۋىل تۇرعىنى جايىق وزەنىنىڭ ەسكى ارناسىنان قارا مەتال جيناۋ كەزىندە ازامات سوعىسى كەزىنەن قالعان التى ارتيللەريالىق سنارياد تاۋىپ العان. بۇلاردىڭ ۇزىندىعى 30 سانتيمەتر، ديامەترى 8,5 سانتيمەتر.

«قازىرگى كەزدە وقيعا ورنىندا ب ق و پوليتسيا دەپارتامەنتىنىڭ ساپەرلارى زالالسىزداندىرۋ باعىتىنداعى جۇمىستاردى جۇرگىزۋدە. تابىلعان سناريادتار بەلگىلەنگەن تارتىپپەن جويىلاتىن بولادى»، دەدى قازاقپارات تىلشىسىنە ب. بەلگىبەكوۆ.

ەسكە سالا كەتەيىك، بۇدان بۇرىن ورالدا جەتى جاسار بالانىڭ ءۇشىنشى قاباتتان قۇلاپ كەتكەنىن جازعان بولاتىنبىز.