اقمولا وبلىسىنىڭ سەلينوگراد اۋدانىندا التى مەكتەپتىڭ قۇرىلىسى جۇرگىزىلۋدە

None
None
كوكشەتاۋ. قازاقپارات - اقمولا وبلىسىنىڭ سەلينوگراد اۋدانىندا التى مەكتەپتىڭ قۇرىلىسى جۇرگىزىلۋدە.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگىدە اۋدان اكىمى باحىدبەك وسپانبەكوۆ ءمالىم ەتتى، دەپ حابارلايدى قازاقپارات ءتىلشىسى.

اۋدان اكىمىنىڭ ايتۋىنشا، وتكەن جىلى ءۇش اۋىسىمدى وقىتۋدى جويۋ ماقساتىندا قوياندى اۋىلىندا 1200 ورىندىق، قاجىمۇقان اۋىلىندا 300 ورىندىق جانە قارامەڭدى باتىر اۋىلىندا 120 ورىندىق ءۇش مەكتەپتىڭ قۇرىلىسى اياقتالدى.

اعىمداعى جىلى تاعى ءتورت نىساندى پايدالانۋعا بەرۋ جوسپارلانۋدا. بۇل قوسشى اۋىلىنداعى 1200 ورىندىق، ارايلى اۋىلىنداعى 300 ورىندىق، وتەمىس اۋىلىنداعى 120 ورىندىق جانە رازدولنوە اۋىلىنداعى 80 ورىندىق مەكتەپتەر. سونداي-اق، قوسشىدا 1200 ورىندىق تاعى ەكى مەكتەپتىڭ قۇرىلىسى جۇرگىزىلۋدە، بۇل وقۋشى ورىندارىنىڭ تاپشىلىعىن تومەندەتۋگە مۇمكىندىك بەرەدى.

جالپى، ءۇش اۋىسىمدى مەكتەپتەر ماسەلەسى مەملەكەت باسشىسىنىڭ تاپسىرماسىنا سايكەس الداعى ەكى جىلدا شەشىلەتىن بولادى.

«اۋداننىڭ ورتا ءبىلىم بەرۋ جۇيەسىندە 48 مەكتەپ جۇمىس ىستەيدى، ونىڭ 46 ى جالپى ءبىلىم بەرەتىن مەملەكەتتىك مەكتەپ تە، 2 ءۋى جەكە مەنشىك مەكتەپ. وقۋشىلاردىڭ جالپى كونتينگەنتى 26 مىڭنان استام وقۋشىنى قۇرايدى. اۋداننىڭ بارلىق مەكتەپتەرى بەينەكامەرالارمەن جابدىقتالعان، ينتەرنەت جەلىسىنە اشىق قولجەتىمدىلىككە يە، بارلىق پاندىك كابينەتتەر كومپيۋتەرلىك تەحنيكامەن جابدىقتالعان، اۋداندا 3 روبوتوتەحنيكا كابينەتى جۇمىس ىستەيدى، بارلىق مەكتەپتەردە IT - سىنىپتار اشىلدى»، - دەدى ۆەدومستۆودان.

وتكەن جىلى مەملەكەت بولگەن قاراجات ەسەبىنەن 4271 دانا كومپيۋتەرلىك تەحنيكا ساتىپ الىندى. وقۋشىلاردى جوعارى جىلدامدىقتى ينتەرنەتپەن قامتاماسىز ەتۋ ءۇشىن «ءبىلىم» تاريفتىك جوسپارى بار 1178 روۋتەر ساتىپ الىنىپ، تاراتىلدى.

«36 مەكتەپتە ەرەكشە ءبىلىم بەرىلۋىنە قاجەتتىلىگى بار 1067 بالا ءۇشىن ينكليۋزيۆتى ءبىلىم بەرۋ ءۇشىن جاعداي جاسالعان. 11 مەكتەپتە 232 بالانى قامتيتىن لوگوپەدتىك پۋنكتتەر جۇمىس ىستەيدى. قوياندى اۋىلىندا 9 بالانى وقىتۋمەن 1 تۇزەتۋ سىنىبى جۇمىس ىستەيدى. سونىمەن قاتار، 1 جاستان 6 جاسقا دەيىنگى بالالاردى مەكتەپكە دەيىنگى مەكەمەلەرمەن قامتۋ دەڭگەيى 74,9 پايىزدى، 3 جاستان 6 جاسقا دەيىنگى بالالاردى قامتۋ 100 پايىزدى قۇرايدى»، - دەپ تولىقتىردى اۋدان اكىمى.

سوڭعى جاڭالىقتار