قىتاي ەلىندە تۇراتىن تالانتتى قازاق بالالارى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ۇلگىلى ورەندەرىمىز كوبەيە بەرسىن! - CNR

1 - ماۋسىم - حالىقارالىق بالالاردى قورعاۋ كۇنى ءار ءۇيدىڭ ءالدي ءانى، وتباسىنىڭ قىزىعى، اتا-انانىڭ جۇرەگى، ءومىرىمىزدىڭ ءىزى، ءۇمىتى بولعان بارلىق بالالارىمىزعا زور دەنساۋلىق، باقىت، ءار كۇندەرىنە شاتتىق تىلەيمىز، دەپ جازادى قىتايلىق kazakcnr.com سايتى.

«ادام ءومىرىنىڭ وشپەس الاۋى، ماڭگىلىك جانىپ تۇرعان شىراعى، ادامدىق اردىڭ ايناسى، ادام ءومىرىنىڭ كوكتەمى، ادام كوڭىلىنىڭ كوركى، اتا-انا ماحابباتىنىڭ اشىلعان گۇل شەشەگى، اتا-انا ماقتانىشى ءارى باقىتى، بولاشاقتىڭ يەسى، ادامزات تاريحىن ماڭگىلىك جالعاستىرۋشى، ادامزات ءومىرىنىڭ سارقىلماس كاۋسار بۇلاعى بولعان بالدىرعاندارىمىزدىڭ مەرەكەسىمەن قۇتتىقتايمىز. وسىنداي شاتتىققا تولى مەرەيلى ساتتە، وزدەرىنىڭ دارا تالانتىمەن، ونەرىمەن ءوز قۇربىلارىنا ۇلگى-ونەگە كورسەتىپ جۇرگەن ونەرلى بالالاردى مەرەكە بايلانىسىمەن وقىرماندارىمىزعا تانىستىرا كەتۋدى ءجون كوردىك. ۇلگىلى ورەندەرىمىزدىڭ قاتارى كوبەيە بەرسىن دەگەن اق تىلەكتەمىز!»، - دەپ جازادى CNR سايتى.

سونىمەن بىرگە اتالعان ب ا ق قىتاي ەلىندە تۇراتىن قانداستارىمىزدىڭ اراسىنان شىققان ءبىر توپ ونەرلى بالالاردىڭ جەتىستىگىنە شولۋ جاساعان.

ناديا سەرىك قىزى - قىتايدىڭ «كۇنباعىس» VI رەسپۋبليكالىق جاس وسپىرىمدەر ءان-ءبي بايقاۋىندا التىن مەدالمەن ماراپاتتالعان. حالىقارالىق بالالار ءسان الەمى بايقاۋىندا ۇزدىك مودەل سىيلىعىن جەڭىپ العان.

دارىن قايسار ۇلى - شىڭجاڭ ولكەسىندە وتكەن «ءتىل سۇلۋلىعى» اتتى مانەرلەپ وقۋ سايىسىنىڭ جانە «مەنىڭ ارمانىم» تاقىرىبىنداعى بالالار اراسىندا وتكەن ۇزدىك ديكتور بايقاۋىنىڭ جۇلدەگەرى اتانعان.

سىمبات ءمادي قىزى - بەيجىڭدە وتكەن XII قىتاي حالىقارالىق جاستار مەن جاس وسپىرىمدەردىڭ كوركومونەر فەستيۆالىندە «ساحارانىڭ ءسانى» اتتى ءبيى التىن مەدال ەنشىلەگەن.

سونىمەن بىرگە شىڭجاڭ ولكەسىندە وتكەن ونەر بايقاۋىندا «بولاشاق جۇلدىز» اتتى ءبيى باس جۇلدە العان.

باۋرا مۇرات قىزى - قىتايدىڭ XX رەسپۋبليكالىق جاس وسپىرىمدەر سۋرەت بايقاۋىندا «ەڭبەكشىل» اتتى تۋىندىسى التىن مەدال ەنشىلەگەن.

اقنار بەرىك ۇلى - 2017-جىلى «بالا جۇلدىز ارمانى»، «ونەرلى بالا» سەكىلدى تەلابايقاۋلاردا دومبىرادا كۇي شەرتىپ، التىن مەدالمەن ماراپاتتالعان.

ءجۇسىپ اتا شەجىرەسى تۇرىك تىلىنە اۋدارىلادى - TRT

قوجا احمەت ياساۋيدىڭ جيەنى ءجۇسىپ اتانىڭ تاريحىنا قاتىستى شەجىرەنىڭ ءبىر بولىگى مەن ارنايى ءمور باسىلعان قۇجاتتار تۇرىك تىلىنە اۋدارىلادى، دەپ حابارلايدى تۇركيا راديو تەلەۆيزيا پورتالى.

«عاسىرلارعا كۋا بولعان وسى قۇجاتتاردى تۇرىك ىنتىماقتاستىق جانە ۇيلەستىرۋ اگەنتتىگى باسىپ شىعارادى. تيكا مەن «ازىرەت سۇلتان» مەملەكەتتىك تاريحي-مادەني قورىق-مۋزەيى اراسىندا ىنتىماقتاستىق مەموراندۋمىنا قول قويىلدى.

كەلىسىم شەڭبەرىندە تۇرىك الەمىنىڭ رۋحاني كوسەمى قوجا احمەت ياسساۋيدىڭ جيەنى جانە شاكىرتى ءجۇسىپ اتانىڭ 3,5 مەترلىك شەجىرەسى رەستاۆراتسيادان وتەدى، تۇرىك تىلىنە اۋدارىلىپ، كىتاپ بولىپ باسىلىپ شىعادى. ت ي ك ا- نىڭ قازاقستانداعى كوورديناتورى يسمايل گۇرلەك شاعاتاي تىلىندە جازىلعان وسى قۇجاتتىڭ تۇركيادا قولجازبالار ينستيتۋتىندا زەرتتەلەتىنىن ايتتى»، - دەپ جازادى TRT.

موڭعوليا 1- ماۋسىمنان باستاپ شەكاراسىن اشتى - KAZNEWS

موڭعوليا 1- ماۋسىمنان باستاپ شەكاراسىن اشتى. بۇل تۋرالى ۇكىمەتتىڭ باسپا ءسوز قىزمەتىنىڭ باستىعى تس. چينزوريگ حابارلادى، دەپ جازادى موڭعوليانىڭ Kaznews اقپاراتتىق پورتالى.

«موڭعوليا 2021-جىلدىڭ 1- ماۋسىمىنان باستاپ ءوز شەكاراسىن اشتى. ناتيجەسىندە ەل ازاماتتارى تۇركيا، ا ق ش، بىرىككەن اراب امىرلىكتەرى، گرەكيا، قىرعىزستان، تايلانديا، برازيليا، ەگيپەت جانە ءۇندىستان قاتارلى وننان استام ەلگە بارا الادى. الداعى ۋاقىتتا موڭعوليا ازاماتتارى ەركىن ساياحاتتايتىن ەلدەر سانىن كوبەيتۋ ماقساتىندا موڭعوليا ۇكىمەتى تاراپىنان كوروناۆيرۋسقا قارسى ۆاكسيناتسيالانعان ازاماتتارعا ۆاكسينا سالدىرعانىن راستايتىن كۋالىك بەرىپ، ونى سەنىمدى دەپ تانۋ ءۇشىن قىتاي، رەسەي، وڭتۇستىك كورەيا، قازاقستان رەسپۋبليكاسى، ماجارستان جانە وزگە ەۋروپا ەلدەرىمەن ديپلوماتيالىق كەلىسسوزدەر جۇرگىزىپ جاتقانىن حابارلادى»، - دەپ جازدى Kaznews.

قازاقستاندىق دەلەگاتسيا تولە ءبي كەسەنەسىن زيارات ەتتى - «ءو ز ا» اقپاراتتىق اگەنتتىگى

«قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ باستاعان دەلەگاتسيا مۇشەلەرى تاشكەنتتەگى تولە ءبي كەسەنەسىن زيارات ەتتى. بۇدان بولەك دەلەگاتسيا مۇشەلەرى «حازىرەت يمام» كەشەنىنە دە باردى»، - دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

اۆتور: باقىتجول كاكەش