اقمولا وبلىسىندا ءۇشىنشى ۇلتتىق حالىق ساناعىنا دايىندىق ءجۇرىپ جاتىر
ساناققا دايىندىق بارىسى تۋرالى ستراتەگيالىق جوسپارلاۋ جانە رەفورمالار اگەنتتىگىنىڭ اقمولا وبلىسى بويىنشا ۇلتتىق ستاتيستيكا بيۋروسى دەپارتامەنتىنىڭ باسشىسى ەربول امامبايەۆ ايتىپ بەردى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.
بۇل - تاۋەلسىزدىك جىلدارىنداعى ءۇشىنشى ۇلتتىق حالىق ساناعى، ول «قازاقستاندا ءبارى ماڭىزدى!» دەگەن ۇرانمەن وتكىزىلەدى.
«ساناقتىڭ ماقساتى - قانشا ەكەنىمىزدى جانە قانداي ەكەنىمىزدى ءبىلۋ. حالىقتىڭ قۇرامى مەن ءومىر ءسۇرۋ جاعدايلارى تۋرالى مالىمەتتەردى ءبىلۋ جانە الدىڭعى حالىق ساناعىنان بەرى وتكەن ۋاقىت ىشىندەگى وزگەرىستەردى باعالاۋ»، - دەيدى ۇلتتىق ستاتيستيكا بيۋروسىنىڭ باسشىسى.
بيىلعى ۇلتتىق ساناقتىڭ جاڭالىعى - زاماناۋي سيفرلىق تەحنولوگيالاردى ەنگىزۋ جانە پروتسەستى اۆتوماتتاندىرۋ.
«حالىق تۋرالى دەرەكتەردى جيناۋ ەكى تاسىلمەن - 1- قىركۇيەكتەن 15- قازانعا دەيىن سايتتا ونلاين-فورماتتا جۇرگىزىلەدى sanaq.gov.kz. 1-30- قازان ارالىعىندا - پلانشەتتەردى قولدانا وتىرىپ ساۋالناما جۇرگىزۋ. ەكى ادىسپەن دە رەسپوندەنت ءوزى ءۇشىن جانە ءۇي شارۋاشىلىعىنىڭ بارلىق مۇشەلەرى ءۇشىن جاۋاپ بەرە الادى»، - دەدى ەربول امامبايەۆ.
ەسكە سالا كەتسەك، 1-30- ماۋسىم ارالىعىندا ۇلتتىق ساناقتىڭ دايىندىق كەزەڭى باستالدى، ول ينتەرۆيۋەردىڭ وندا تۇراتىن ازاماتتاردى ناقتىلاۋ ماقساتىندا تۇرعىن ۇيگە بارۋى ارقىلى جۇرگىزىلەدى. الىنعان اقپارات قاتاڭ قۇپيا بولىپ تابىلادى جانە ستاتيستيكالىق ماقساتتار ءۇشىن پايدالانىلادى.