جاس قوبىزشى ابايدىڭ حالىققا ايگىلى اندەرىن ءبىر كومپوزيتسيادا جيناقتادى

نۇر-سۇلتان. قازاقپارات - جاس قوبىزشى ايدانا امانگەلدى ابايدىڭ حالىققا ايگىلى اندەرىنەن قۇرالعان كومپوزيتسيانى تانىستىردى، دەپ حابارلايدى قازاقپارات ءتىلشىسى.

جاس ونەرپاز 6 جاسىنان باستاپ قوبىز اسپابىندا وينايدى. سودان بەرى ءتۇرلى حالىقارالىق كونكۋرستاردىڭ لاۋرەاتى اتاندى. الەمنىڭ ۇزدىك كونسەرتتىك زالدارىندا ونەر كورسەتىپ، رەپەرتۋارىندا 100 دەن استام شىعارما بار.

«كيەلى تۇركىستاندا تۇسىرىلگەن ابايدىڭ حالىققا ايگىلى «جەلسىز تۇندە جارىق اي»، «كوزىمنىڭ قاراسى»، «ايتتىم سالەم، قالامقاس» اندەرىنەن قۇرالعان كومپوزيتسيانى قابىل الىڭىزدار»، - دەپ جازدى ا. امانگەلدى الەۋمەتتىك جەلىدەگى پاراقشاسىندا.

ايدانا امانگەلدىنىڭ ورىنداۋىنداعى وسى جانە باسقا كومپوزيتسيالار Viva Music All World بايقاۋىندا قامتىلادى. ونداعى جەڭىس نيۋ-يورككە بارۋعا جانە قوبىز ءۇنىن تانىمال Carnegie Hall-دا شىرقاتۋعا مۇمكىندىك بەرەدى.

بيىلعى 4- ماۋسىمدا قوبىزشى YouTube-تەگى كانالىندا ابايدىڭ اندەرى قامتىلعان كومپوزياتسيانىڭ ۆيدەوسىن جاريالادى. ابايدىڭ حالىققا ايگىلى «جەلسىز تۇندە جارىق اي»، «كوزىمنىڭ قاراسى» ، «ايتتىم سالەم، قالامقاس» اندەرى ءبىر كومپوزيتسيادا جيناقتالىپ وتىر.

قوبىزشى ايدانا امانگەلدىنىڭ ورىنداۋىنداعى كومپوزيتسيا تۇركىستان قالاسىندا تۇسىرىلگەن. وسى ورايدا جاس ونەرپاز بۇل ەڭبەككە بار كۇش-جىگەرىن سالعانىن اتاپ ءوتتى. ءوز كەزەگىندە كورەرمەندەر ايدانانىڭ تالانتىنا ءتانتى بولىپ، جىلى لەبىزدەرىن ءبىلدىردى.