استانادا «بالىق» كوپىر جوندەۋ جۇمىستارىنا جابىلادى

نۇر-سۇلتان. قازاقپارات - نۇر-سۇلتان قالاسىندا «اتىراۋ» جاياۋ جۇرگىنشىلەر كوپىرى جوندەۋ جۇمىستارىنا جابىلادى، دەپ حابارلايدى قازاقپارات.

«7 - ماۋسىم مەن 4 - شىلدە ارالىعىندا جوندەۋ جۇمىستارىنا بايلانىستى «اتىراۋ» جاياۋ جۇرگىنشىلەر كوپىرى جارتىلاي جابىلادى. مارشرۋتتى الدىن الا جوسپارلاۋدى سۇرايمىز جانە كەلتىرىلگەن قولايسىزدىقتار ءۇشىن كەشىرىم سۇرايمىز»، - دەلىنگەن ەسىل اۋدانى اكىمدىگىنىڭ Instagram-پاراقشاسىندا.

ەسكە سالايىق، كوپىردى ەلوردانىڭ 20 جىلدىق مەرەيتويىنا وراي اتىراۋ وبلىسى سالىپ، سىيعا تارتقان بولاتىن. كوپىرگە جوعارىدان قاراعاندا، ونىڭ ءپىشىنى اتىراۋ وبلىسىنىڭ سيمۆولى سانالاتىن بالىققا ۇقسايدى.

ونىڭ جالپى ۇزىندىعى - 313,5 مەتر، ەنى - 10,5 مەتر. كوپىردە جاياۋ جۇرگىنشىلەرگە ارنالعان التى مەترلىك جولاق، ۆەلوسيپەدشىلەرگە ارنالعان ءۇش مەترلىك جولاق، سونداي-اق ەنى 0,5 مەتر بولاتىن قاۋىپسىزدىك جولاعى جانە 0,5 مەترلىك شارباقتى قورشاۋعا ارنالعان ەكى جولاق بار.

كوپىر جابىندىسى ءۇشىن ليتاكريل پايدالانىلعان. بۇل نىسان اۋا رايى جاعدايىنا ەسكەرىلە وتىرىپ سالىنعان. ونى جوبالاعاندا جەلدىڭ اسەرى دە ەسەپكە الىنعان. سالماعى - 1920 توننا.

اتىراۋ وبلىسىنىڭ اكىمى نۇرلان نوعايەۆتىڭ ايتۋىنشا، كوپىر قۇرىلىسى 6 ميلليارد تەڭگەگە باعالانعان.