قايسى ەلدىڭ شىعارعان ۆاكسيناسىن تاڭداعان دۇرىس

نۇر- سۇلتان. قازاقپارات - دەنساۋلىق ساقتاۋ مينيسترلىگى وتكىزگەن ونلاين دارىستە بەلگىلى اللەرگولوگ- يممۋنولوگ رافايل روزەنسون ۆاكسينا تاڭداۋدا نەنى باسشىلىققا الۋ كەرەكتىگىن ءتۇسىندىردى، دەپ حابارلايدى قازاقپارات.

«ۆاكسينا تاڭداعان كەزدە ءوزىڭىز نەنى قالايتىنىڭىزدى ويلاپ، ولشەمدەر بەلگىلەپ الىڭىز. ەڭ ءبىرىنشى نە قاجەت؟ بارىنشا ءتيىمدى بولعانى كەرەك پە؟ ۇزاق ۋاقىت جارامدى بولعانى ماڭىزدى ما؟ قاۋىپسىزدىك دارەجەسى قانداي؟ ەگەر ءبىرىنشى ورىنعا قاۋىپسىزدىكتى قويساڭىز، جانسىزداندىرىلعان، يناكتيۆتى ۆاكسينانى تاڭداڭىز. بۇل - ءبىزدىڭ جاعدايدا QazVac نەمەسە Sinovak. ەگەر ءبىرىنشى ورىندا ءسىز ءۇشىن سەنىمدىلىك پەن ۇزاق ۋاقىت جارامدىلىق تۇرسا، رەسەيلىك «سپۋتنيك V « - ءدى تاڭداڭىز. ال ەگەر باسقا دا ولشەمدەر ماڭىزدى بولسا، ماقتانىپ قالعىڭىز كەلۋ مۇمكىن، امەريكاعا بارىپ، Pfizer نەمەسە Moderna ۆاكسيناسىن سالعىزۋدىڭ امالىن تابىڭىز»، - دەدى دارىگەر.

ساراپشى قازىر قولدانىستاعى ۆاكسينانىڭ ەشبىرىن 100 پايىز يدەالدى دەپ باعالاۋعا بولمايتىنىن ەسكەرتتى.

«ءار ادام ۆاكسينا تاڭدار كەزدە وزىڭىزگە تىزبەلەپ شىقساڭىز دا يدەالدى ۆاكسينا تابىلمايدى. ۇيىڭىزگە Pfizer- ءدى تەگىن اكەپ بەرۋدىڭ مۇمكىندىگى جوق. ونى -80 گرادۋس تەمپەراتۋرادا ۇستاۋ كەرەك. ونداي مۇمكىندىگى بار تاسىمالداۋشى جوق ءبىزدىڭ ەلدە. قولدا بار ۆاكسينانىڭ ىشىنەن تاڭداڭىز. قازىر كەيبىر ەلدەردە «سپۋتنيك V «- ءدىڭ ءوزى تاپشى بولىپ جاتىر. سەگىز اي بۇرىن كوروناۆيرۋستىڭ قۇرساۋىنان شىعاتىن جالعىز جول ۆاكسينا ەكەنىن ايتقانىمدا مەنى جەلى قولدانۋشىلار جەپ قويا جازداعان. ال قازىر جاعداي وزرگەرگەن. مەنى سول قۋانتادى»، - دەيدى دارىگەر.

اۆتور: ەسىمجان ناقتىباي