ونكولوگيالىق سىرقاتى بار ادامدار ۆاكسينانى قالاي الۋى كەرەك
ونكولوگيالىق اۋرۋلارى بار، يممۋندىق تاپشىلىق سەزىنىپ جۇرگەن ادامدار ءۇشىن ۆاكسينا قانشالىقتى جارامدى؟ ەكپە العانمەن يممۋنيتەت قالىپتاسپاي قالۋى مۇمكىن بە؟ دەنساۋلىق ساقتاۋ مينيسترلىگى ۇيىمداستىرعان ونلاين دارىستە اللەرگولوگ- يممۋنولوگ رافايل روزەنسون بۇل سۇراقتارعا بىلاي دەپ جاۋاپ بەردى:
«ءوزىم وقىعان اقپاراتتارعا سۇيەنىپ جاۋاپ بەرىپ كورەيىن. بۇكىل الەمدە ءبىر عانا پرينتسيپ بار. اۋرۋ اسقىنىپ تۇرعان كەزدە ۆاكسينا سالۋ قاجەت ەمەس. مىسالى اعزادا ىسىك پايدا بولا قالدى دەيىك، ارينە، ونداي اعزاعا ءتىرى ۆاكسينا سالۋعا بولمايدى. ءتىرى ۆاكسينا ىسىك اعزاسىن جەڭىپ تۇرعان ادامعا كەرى اسەر ەتۋى مۇمكىن. ءبىراق ىسىكتى العىزىپ، بەلسەندى ەم العاننان كەيىن مىندەتتى تۇردە ۆاكسينا الۋ كەرەك. بۇل - اتالمىش ادامدى اجالدان قۇتقارۋدىڭ بىردەن- ءبىر امالى»، - دەدى مامان.
سونداي- اق، ول اۋتويممۋندىق اۋرۋلارعا دا ءدال وسى قاعيدات قولدانىلاتىنىن اتادى. «ريەۆموتويدتى ءارتريتتىڭ بەلسەندى فازاسىندا جۇرگەن ادامنىڭ اعزاسىندا اۋتويممۋندىق پروتسەستەر قاتتى جۇرەدى. بۇل كەزدە ۆاكسينا الۋعا بولمايدى، ارينە. جاقسىلاپ ەمدەپ، بەلسەندى پروتسەستەردى جويعاننان كەيىن ەكپە سالۋعا بولادى. پوداگرامەن اۋىراتىن ناۋقاستارعا ءدال وسىنداي ءتاسىل قولدانىلادى. ءزار قىشقىلىنىڭ دەڭگەيىن ەم ارقىلى تومەندەتىپ، سودان كەيىن بارىپ ۆاكسينامەن قورعاۋ كەرەك. اعزاداعى سىرقاتتاردى ۆاكسينا سالماۋدىڭ سىلتاۋى رەتىندە جانە كەرى كورسەتكىشتەرى رەتىندە قاراماۋىمىز كەرەك. سوزىلمالى اۋردىڭ بولۋى ونى باقىلاۋعا الۋعا عانا نەگىز بولۋى كەرەك»، - دەدى ساراپشى.
اۆتور: ەسىمجان ناقتىباي