ارنايى كەلىپ، ايلاپ جاتادى: قورعالجىن تۋريستەردى نەسىمەن قىزىقتىرادى؟

قورعالجىن. قازاقپارات - قورعالجىن دەسە كوپ ادامداردىڭ ويىنا الدىمەن قورىق پەن ونى مەكەندەيتىن قوقيقازدىڭ كەلەتىنى راس.

سەبەبى اتالعان مەكەن قازاقستان اۋماعىندا عانا ەمەس، الىس-جاقىن شەت ەلدەردە دە كەڭىنەن تانىس.

بۇل وڭىرگە اسىرەسە شەتەلدىك قوناقتاردىڭ جانى قۇمار كورىنەدى. وسى ورايدا قورعالجىن ەكولوگيالىق وبسەرۆاتورياسىننىڭ نەگىزىن قالاۋشى قۇرالاي تۇسپەكوۆا قورعالجىننىڭ تۋريستىك قاۋقارى مەن بۇگىنگى تىنىس-تىرشىلىگى تۋرالى قازاقپارات تىلشىسىنە ايتىپ بەردى.

«قورعالجىندا ورنيتولوگيالىق ورتالىقتىڭ قۇرىلعانىنا 4 جىل بولدى. ورتالىقتى اشۋداعى ماقسات - تۋريست تارتۋ عانا ەمەس، وسىنداعى مەكەندەيتىن قۇستاردى زەرتتەپ-زەردەلەۋ جانە قورعاۋ. مۇندا تۋريستەر الدىمەن قۇستاردى تاماشالاۋعا كەلەدى. ونىڭ سەبەبى بىزدە باسقا وڭىرلەردە مەكەندەمەيتىن الۋان ءتۇرلى قۇستار بار، سونىڭ ءبىرى ول قوقيقاز. پاندەمياعا دەيىن قورعالجىنعا جىلىنا 5 مىڭ شەتەلدىك تۋريست كەلەتىن. جىلدىڭ مامىر مەن قىركۇيەك ايىنىڭ ارالىعى تۋريستىك ماۋسىم بولىپ تابىلادى.

ەكىنشىدەن، سىرتتان كەلەتىن تۋريستەردى جەرگىلىكتى حالىقتىڭ سالت-ءداستۇرى، تۇرمىس-تىرشىلىگى مەن ۇلتتىق تاعامى قىزىقتىرادى. سول ءۇشىن دە ءبىز دايىندالىپ، ۇلتتىق ەرەكشەلىكتەرىمىزدى، قازاقيلىعىمىزدى بارىنشا جوعارى دەڭگەيدە كورسەتۋگە تىرىسامىز»، - دەدى قۇرالاي تۇسپەكوۆا.

ونىڭ ايتۋىنشا، قورعالجىنعا شەتەلدەن كەلەتىن تۋريستەر نەگىزىنەن ينتەرنەتتەن ەستىپ، بىلەتىن كورىنەدى.

«ارينە شەتەلدىك تۋريستەردىڭ كەلەتىنى ءبىزدى قۋانتادى. سايكەسىنشە، قورعالجىن تۋرالى قايدان ەستىپ، بىلدىڭىزدەر دەپ سۇرايمىز. كوبىسىنىڭ ايتاتىنى ينتەرنەت ارقىلى دەيدى. سونداي-اق، حالىقارالىق ورنيتولوگتاردىڭ مالىمدەۋىنشە، ولاردىڭ الەم بويىنشا ۇزدىك 10 توپ ورنى بار، سونىڭ ءبىرى قورعالجىن ەكەن.

ولاردىڭ ايتۋىنشا، قورعالجىننىڭ تاعى تاڭعالدىراتىنى ءبىر مەكەندە ءتۇرلى ساناتقا جاتاتىن قۇستاردىڭ مەكەن ەتۋى. ولار ءبىز قوقيقازدى افريكانىڭ ءبىر شەتىنە بارىپ تاماشالاساق، ال ءبىرقازاندى كورۋ ءۇشىن قۇرلىقتىڭ ەكى شەتىنە بارامىز، ال سىزدەردە ءبارى ءبىر جەردە دەپ تاڭعالىستارىن جاسىرمايدى. سول ۇشىندە شەتەلدىك تۋريستەر بىزگە ارنايى كەلىپ، ايلاپ جاتادى»، - دەيدى ول.

ەكولوگيالىق-تۋريستىك وبسەرۆاتوريا جەتەكشىسىنىڭ مالىمدەۋىنشە، وتاندىق ساياحاتتاۋشىلاردىڭ ىشىندە قورعالجىنعا كوبىنەسە بالالار قىزىعادى. ياعني بالالارعا ارنالعان ەكسكۋرسيالار مەن تانىمدىق ءىس-شارالار ءجيى ۇيىمداستىرىلادى.

«كەلەم دەۋشى كەز-كەلگەن تۋريستىڭ تالابى مەن كوڭىلىنەن شىعۋعا تىرىسامىز. دەگەنمەن ءبىز بار كۇش-جىگەرىمىزدى بالالار مەن جاس وسپىرىمدەرگە باعىتتايمىز. سەبەبى ءبىز ولارعا قورعالجىننىڭ ادەمى جەرلەرى مەن قۇستارىن كورسەتىپ قانا ەمەس، وسكەلەڭ ۇرپاققا تابيعاتتى ايالاۋ، قورشاعان ورتانى قورعاۋ قاسيەتتەرىن قوسا ۇيرەتكىمىز كەلەدى»، - دەيدى ول.

سونداي-اق، ق. تۇسپەكوۆا قورعالجىندا ىشكى تۋريزمدى ىلگەرىلەتۋدە پاندەميانىڭ كەرى اسەرى تيگىزگەنىن دە جاسىرمايدى.

«وتكەن جىلى قاتاڭ كارانتيندىك تالاپتار ەنگىزىلگەن كەزدەن باستاپ، ءبىز ءوز جۇمىسىمىزدى توقتاتتىق. بيىلدان باستاپ قانا، اقىرىنداپ قايتا قولعا الىپ جاتىرمىز. دەسەكتە پاندەميانىڭ وڭ اسەرى دە بولدى. سەبەبى شەتەلگە شىعۋعا تىيىم سالىندى، ونىڭ ۇستىنە قاۋىپتى بولعاندىقتان الىس-جاقىن قالالار مەن ەلدىمەكەندەردەن وتانداستارىمىز بىزگە كەلە باستادى. قازىرگى ۋاقىتتا ءار دەمالىس سايىن تۋريستەردى تۇراقتى تۇردە قابىلداۋدامىز. جاز مەزگىلى باستالدى، ناعىز تۋريستىك ماۋسىم، وسى ورايدا بالالارعا ارنالعان جازعى ەكولوگيالىق لاگەرىمىزدىڭ دە جۇمىسىن جانداندىرۋدى جوسپارلاپ وتىرمىز. ارينە كارانتيندىك تالاپتاردىڭ ساقتايتىن بولامىز. ونىڭ ۇستىنە بالالار كوبىنەسە تازا اۋا مەن تابيعات اياسىندا بولادى. بالالاردى 3 نەمەسە 7 كۇنگە قورعالجىننىڭ تابيعاتىمەن تانىستىرىپ، شىعارماشىلىق ارقىلى تابيقاتقا جاناشىرلىقپەن قاراۋعا باۋليتىن بولامىز»، - دەيدى قورعالجىنداعى ەكولوگيالىق وبسەرۆاتوريانىڭ نەگىزىن قالاۋشى.

ءسوز سوڭىندا، تابيعات جاناشىرى قورعالجىندا ءتۋريزمدى دامىتۋداعى نەگىزگى پروبلەمالاردى ايتىپ بەردى.

«ەڭ الدىمەن ول ينفراقۇرىلىمنىڭ جوقتىعى. جول ناشار، اۋىزسۋ كەيدە اپتالاپ بولمايدى. سول سياقتى ءبىز جول سالىپ قانا قويماي كەلگەن تۋريستەردىڭ قاۋىپسىزدىگىن قامتاماسىز ەتىپ، ولاردىڭ تالاپتارىنا قاراي جاعداي جاساۋىمىز كەرەك. زاماناۋي سۇرانىسقا ساي دەمالىس ورىندارى سالىنسا دەيمىز. سوندا عانا ءبىز تۋريستەردى تارتا الامىز»، - دەدى ق. تۇسپەكوۆا.