ەلوردادا تاعى ءبىر ساۋدا ورتالىعىندا كوروناۆيرۋس ۆاكسيناسى ەگىلە باستادى

نۇر-سۇلتان. قازاقپارات - ەلوردا تۇرعىندارى مەن قوناقتارىن كوروناۆيرۋس ينفەكسياسىنا قارسى ۆاكسيناتسيالايتىن ساۋدا ورىندارىنىڭ ءتىزىمىن قالانىڭ وڭ جاعالاۋىنداعى «ەۋرازيا» ساۋدا ءۇيى تولىقتىردى، دەپ حابارلايدى قازاقپارات قالا اكىمدىگىنە سىلتەمە جاساپ.

مۇندا ازاماتتار ۆاكسينانىڭ ەكى ءتۇرىن قابىلداي الادى: رەسەيلىك «سپۋتنيك- V» پرەپاراتى جانە قىتايلىق «SinofarmHayat-Vak» ۆاكسيناسى.

«قالا تۇرعىندارى تىعىز ورنالاسقان اۋدانداردىڭ ءبىرىن ۆاكسيناتسيالاۋمەن قامتۋ ءۇشىن «ەۋرازيا» ساۋدا ۇيىندە دە ەگۋ پۋنكتىن اشۋدى ءجون كوردىك. اۋدان تۇرعىندارى دا اتالمىش ساۋدا ورنىندا اشۋ تۋرالى بىرنەشە رەت ءوتىنىش بىلدىرگەن. نۇر-سۇلتان قالاسى بويىنشا سانيتارلىق- ەپيدەميولوگيالىق باقىلاۋ دەپارتامەنتىمەن بىرلەسىپ، وسى ماسەلەنىڭ مۇمكىندىگىن قاراستىردىق جانە ازاماتتارعا ىڭعايلى بولۋ ءۇشىن ۆاكسيناتسيالاۋ پۋنكتتەرىن اشۋ تۋرالى شەشىم قابىلدادىق. ەپيدەميولوگيالىق تالاپتاردى ساقتاي وتىرىپ، وسى جەردە ۆاكسيناتسيا جۇرگىزىلەتىن بولادى»، - دەپ اتاپ ءوتتى قالالىق قوعامدىق دەنساۋلىق ساقتاۋ باسقارماسى.

ۆاكسيناتسيا ورنى «ەۋرازيا-3» ساۋدا ءۇيىنىڭ ءتورتىنشى قاباتىندا ۇيىمداستىرىلعان.

ۆاكسيناتسيالاۋعا تىركەۋ بريگادانىڭ كەستەسىنە جانە ساۋدا ءۇيىنىڭ جۇمىس رەجيمىنە سايكەس ساعات 19.30 عا دەيىن جۇرگىزىلەدى.

ەستەرىڭىزگە سالا كەتەيىك، ەلوردادا بۇگىنگە دەيىن «Mega Silk Way»، «Keruen»، «حان شاتىر»، «ءابۋ-دابي پلازا»، «ازيا پارك»، «سارىارقا» ساۋدا ويىن-ساۋىق ورتالىقتارىندا، «الەم»، «استانالىق»، «ەۋرازيا» ساۋدا ۇيلەرىندە ۆاكسيناتسيا پۋنكتى اشىلعان بولاتىن.

قالا اكىمى التاي كولگىنوۆتىڭ تاپسىرماسى بويىنشا ولاردىڭ سانى ءۇش ەسە ارتتى.

باسقارما مالىمەتىنشە، قويمالاردا رەسەيلىك «سپۋتنيك- V» جانە قىتايلىق Sinofarm Hayat-Vak ۆاكسينالارىنىڭ مولشەرى جەتكىلىكتى. جاقىن ارادا QazVac وتاندىق پرەپارات جەتكىزىلەدى.