تۇركىستاندا كونە تۇركى تىلىندەگى العاشقى قۇران كىتابىنىڭ تۇساۋى كەسىلدى - فوتو

تۇركىستان. قازاقپارات - بۇگىن حالىقارالىق تۇركى اكادەمياسى تۇركىستان قالاسىندا قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىمەن بىرلەسىپ، «تۇركىستان - تۇركى الەمىنىڭ رۋحاني استاناسى» اتتى حالىقارالىق كونفەرەنتسيا وتكىزدى.

كونفەرەنسياعا قاتىسۋشىلار الدىمەن احمەت ياساۋي كەسەنەسىنە ارنايى بارىپ، تاعزىم ەتتى، دەپ حابارلايدى قازاقپارات ءتىلشىسى.

القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركسوي ۇيىمىنىڭ باس حاتشىسى دۇيسەن قاسەيىنوۆ، تۇركى كەڭەسى باس حاتشىسىنىڭ ورىنباسارى ومەر كوجامان، قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ رەكتورى جانار تەمىربەكوۆا قاتىستى.

سونداي-اق، قازاقستان رەسپۋبليكاسى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ەرجان مۇقاشيەۆ، قازاقستان رەسپۋبليكاسى اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ ءتوراعاسى ەرجان نۇكەجانوۆ، تۇركيا رەسپۋبليكاسىنىڭ الماتى قالاسىنداعى باس كونسۋلى الي ريزا اكىندجى، «بىلگە تۇرىك» مادەنيەت قورىنىڭ باسقارما ءتوراعاسى، ەكس- گۋبەرناتور گۋنگور ازيم تۋنا، تۇركىستان وبلىسى اكىمىنىڭ ورىنباسارى ساكەن قالقامانوۆ، سونىمەن قاتار زيالى قاۋىم وكىلدەرى مەن تانىمال عالىمدار شاقىرىلدى.

باسقوسۋ اياسىندا قاراحان مەملەكەتى داۋىرىندە (X عاسىر) كونە تۇركى تىلىنە اۋدارىلعان العاشقى قۇران كىتابىنىڭ تۇساۋكەسەر ءراسىمى جاسالدى.

حالىقارالىق تۇركى اكادەمياسى باسىپ شىعارعان بۇل بىرەگەي باسىلىم ءبىزدىڭ زامانىمىزعا جەتكەن قۇران اۋدارماسىنىڭ ەڭ كونە ءارى تولىق نۇسقاسى سانالادى.

بۇگىندە بۇل قولجازبا ىستانبۇل قالاسىنداعى تۇرىك جانە يسلام ونەرى مۋزەيىندە ساقتاۋلى تۇر. تۇركىستان توپىراعىندا تۋىپ، جەتىلگەن عۇلامالار سۋسىنداعان مىڭجىلدىق مۇرا وسىلايشا تۇركولوگيا، ءتىل دانە ءدىن ماسەلەلەرىنە قىزىعۋشىلىق تانىتاتىن عالىمدار مەن ىزدەنۋشىلەرگە قولجەتىمدى بولىپ، تولىق فاكسيميلە نۇسقاسىندا تۇڭعىش رەت جاريالانىپ وتىر. قاسيەتتى كىتاپتىڭ جارىق كورۋى تۇركىستاننىڭ تۇركى الەمىنىڭ رۋحاني استاناسى اتانۋىمەن تۇسپا-تۇس كەلدى.

كەلەلى كەڭەسكە قاتىسۋشىلار ەلباسى باستاماسىمەن قايتا تۇلەگەن تۇركىستان جانە ونىڭ تۇركى الەمىندەگى ماڭىزى تۋرالى ويلارىن ورتاعا سالىپ، باۋىرلاس ەلدەردىڭ بىرلىگى جايىندا پايىمدى پىكىرلەرىمەن ءبولىستى. باسقوسۋدان كەيىن مارتبەلى مەيماندار تۇگەل تۇركىنىڭ ءتورى سانالاتىن تۇركىستان قالاسىنداعى تاريحي ورىنداردى ارالاپ، جاڭادان بوي كوتەرگەن عيماراتتارمەن تانىستى.

ايتا كەتۋ كەرەك، بيىل 31-ناۋرىزدا قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ توراعالىعىمەن وتكەن تۇركى كەڭەسىنىڭ بەيرەسمي سامميتىندە تۇركىستان قالاسىن تۇركى الەمىنىڭ رۋحاني استاناسى دەپ جاريالانعان بولاتىن.

اۆتور: اينۇر اقبايەۆا